2 крымінальныя справы і 13 пратаколаў аб адміністрацыйным правапарушэнні — такі вынік спецыяльнай праграмы «Мак», якая праводзілася на Пастаўшчыне з 1 чэрвеня па 15 верасня.
Галоўнай задачай праграмы з’яўляецца выяўленне і знішчэнне незаконных пасеваў наркаўтрымальных раслін (маку і канопляў), выключэнне з незаконнага абароту наркатычных сродкаў расліннага паходжання, а таксама правядзенне прафілактычных мерапрыемстваў і растлумачальнай работы сярод насельніцтва. З гэтай мэтай супрацоўнікі райаддзела ўнутраных спраў штогод з наступленнем лета самую пільную ўвагу звяртаюць на прысядзібныя ўчасткі грамадзян, лугі і палі, каб не дапусціць вырастання названых раслін, прыцягваюць да адказнасці тых, хто іх сее. І хоць гаспадарам пасеваў, як правіла, прыходзіцца адказваць па ўсёй строгасці закону, сейбіты па-ранейшаму знаходзяцца.
— У жніўні на адным з прысядзібных участкаў у вёсцы Яськавічы, які належыць жыхару Мінска, мы выявілі 10 кустоў канопляў агульнай вагой больш за кілаграм, — расказваў старшы оперупаўнаважаны групы па наркакантролі і процідзеянні гандлю людзьмі АУС райвыканкама Міхаіл Ходан. — Пры правядзенні агляду ў доме знайшлі амаль 100 грамаў марыхуаны, расфасаванай у папяровыя кулькі. Па словах затрыманага, каноплі ён вырошчваў для ўласнага спажывання, набыўшы насенне ў невядомых яму асоб. У дачыненні да грамадзяніна, які год назад прыцягваўся да крымінальнай адказнасці Фрунзенскім РУУС Мінска за незаконны абарот наркатычных сродкаў і псіхатропных рэчываў, узбуджаны адразу дзве справы — па ч. 1 арт. 328 і ч. 2 арт. 329 Крымінальнага кодэкса Рэспублікі Беларусь. Яму пагражае да 5 гадоў абмежавання волі або пазбаўленне волі на тэрмін ад 3 да 7 гадоў.
Таксама супрацоўнікамі міліцыі выяўлена 13 фактаў незаконнага вырошчвання маку, знішчана 8,5 кілаграма гэтай расліны на агульнай плошчы 45 м2. Вырошчвалі яе на сваіх агародах і клумбах у горадзе і раёне ў асноўным састарэлыя грамадзяне. Многія — з мэтай атрымаць насенне для выпечкі, некаторым проста падабалася прыгожая кветка. Нягледзячы на гэта, усе яны атрымалі, няхай сабе і мінімальныя, штрафы. А таксама папярэджанні аб тым, што, калі зноў пасеюць мак, сума штрафу будзе ў разы вышэйшай.
Хоць спецпраграма «Мак» завершана, работа па выяўленні незаконных пасеваў наркаўтрымальных раслін працягваецца. Таму парада для ўсіх: не сейце мак і каноплі, а калі яны раптам выраслі, лепш самастойна знішчыце расліны. У адваротным выпадку давядзецца заплаціць да 20 базавых велічынь.
