З жаданнем дапамагаць

Добры настрой напярэдадні Дня ратаўніка ў работнікаў раённага аддзела па надзвычайных сітуацыях. На працягу пяці гадоў на Пастаўшчыне назіраецца зніжэнне колькасці пажараў і загінулых на іх. Так, калі ў 2011-ым было зарэгістравана 56 выпадкаў свавольства "чырвонага пеўня" ў дамах і гаспадарчых пабудовах жыхароў раёна, то ў 2015-ым — толькі 33. Загінулі адпаведна 10 і 2 чалавекі. Колькасць ахвяр магла быць большай, калі б не граматныя дзеянні пажарных, якім нярэдка даводзілася выконваць сваю работу ў складанай аператыўнай абстаноўцы, з рызыкай для жыцця і здароўя, праяўляць смеласць і рашучасць, самаадданасць і мужнасць.

Усё гэта непасрэдным чынам датычыць работнікаў пажарнага аварыйна-выратавальнага паста №13 г.п. Варапаева: прапаршчыкаў унутранай службы Юрыя Аляксандравіча Рымко, Паўла Сцяпанавіча Мазуркевіча, старшыны Юрыя Сямёнавіча Лысёнка, сяржантаў Віталія Уладзіслававіча Жукяна і Яўгенія Міхайлавіча Сварцэвіча (на здымку). Мінулым летам на пажарах жылых дамоў у гарадскім пасёлку яны вывелі з агню іх гаспадароў. Я. М. Сварцэвіч, акрамя таго, выратаваў жыццё яшчэ аднаму чалавеку, які на аўтамабілі ўехаў у дрэва і быў атакаваны шэршнямі, што звілі на ім гняздо. Сам пакусаны небяспечнымі насякомымі, Яўгеній дапамог вадзіцелю выбрацца з машыны і пакінуць гэта месца.

У кожнага з названых ратаўнікоў розны стаж работы ў РАНС: адны працуюць тут па 10-15 і больш гадоў, іншыя прыйшлі зусім нядаўна. Але аб'ядноўвае іх жаданне дапамагаць людзям.

Алена ШАПАВАЛАВА