Колькасць навучэнцаў Навасёлкаўскай сярэдняй школы павялічылася на 39.
Надзвычай хвалюючым быў сёлетні Дзень ведаў не толькі для навучэнцаў Навасёлкаўскай сярэдняй школы, але і для педагогаў. У сувязі з закрыццём Старадворскай БШ калектыў папоўніўся чатырма новымі настаўнікамі і 35 вучнямі. Кожны з іх з асаблівай трывогай пераступіў парог новай школы. 2 вучні дабавіліся з Лучая, 2 — з Муляраў (сем’і пераехалі ў ААТ «Навасёлкі-Лучай»). 13 дзетак прыйшлі ў першы клас. З іх урачыстага выхаду і пачалася лінейка. На чале з вопытным педагогам Галінай Хіло першакласнікі пад гучныя апладысменты зрабілі круг гонару і занялі сваё месца.
У прывітальным слове дырэктар школы Валянціна Пяткевіч павіншавала ўсіх з пачаткам навучальнага года, пазнаёміла з новымі настаўнікамі і ўручыла граматы Вікторыі Буяліч і Марыі Лібоза, якія найбольш паспяхова закончылі курс базавай школы. Іх фотаздымкі, а таксама вучняў Старадворскай базавай школы Кірыла Коўзана, Дзяніса Рыхліцкага, Жэні Лук’яненкі, Антона Зямчонка, у якіх гадавыя адзнакі 8-10, папоўняць школьную Дошку гонару.
Для падвозу дзяцей на заняткі за бюджэтныя сродкі райвыканкам набыў аўтобус. 1 верасня яго вадзіцель Тадэвуш Шырневіч зрабіў першыя рэйсы: спачатку ў школу былі дастаўлены 18 вучняў 5-10 класаў, затым 17 пачаткоўцаў. Сімвалічнае ўручэнне ключоў адбылося на лінейцы. Іх дырэктар школы атрымала з рук старшыні раённага Савета дэпутатаў Пятра Курто. Ён павіншаваў настаўнікаў, навучэнцаў і іх бацькоў са святам, пажадаў поспехаў і адзначыў, што Навасёлкаўская школа ў ліку лепшых у раёне. За шматгадовую добрасумленную працу ў сістэме адукацыі, вялікі асабісты ўклад у падрыхтоўку школы да новага навучальнага года Ганаровай граматай раённага Савета дэпутатаў узнагароджана дырэктар. Затым Пётр Леанідавіч уручыў першакласнікам кнігу “Беларусь — мая Радзіма” — падарунак ад Прэзідэнта Рэспублікі Беларусь, а Таццяна Сарока як старшыня пярвічкі раённай арганізацыі грамадскага аб’яднання “Белая Русь” — неабходныя школьныя прылады ад “Белай Русі”.
Затым да прысутных звярнуўся намеснік дырэктара ААТ “Навасёлкі-Лучай” Міхаіл Дайлідзёнак. Ён падзякаваў кіраўніцтву школы за цеснае супрацоўніцтва, дапамогу, якую вучні і настаўнікі аказваюць падчас правядзення сельскагаспадарчых работ, а ў якасці падарунка ўручыў музычную апаратуру. Рашэннем адміністрацыі гаспадаркі грашовымі прэміямі адзначана старанная праца на зернетаку ў час жніва сясцёр Марыі і Дзіяны Лібоза, Надзеі Вартазаран.
Права даць першы званок было прадастаўлена выпускніку Вадзіму Хомічу і першакласніцы Каці Лешчык. Ён і паклікаў вучняў за парты на першы ўрок, прысвечаны Году малой радзімы. Адзінаццацікласнікі разам з класным кіраўніком Яніяй Анкудовіч адправіліся на экскурсію па Навасёлках, дзе ўспаміналі яркія моманты дзяцінства, дзяліліся ўражаннямі. А шасцікласнікі і васьмікласнікі разам з настаўніцамі Аленай Дзевятоўскай і Таццянай Сарока пагасцявалі ў аграсядзібе “Акарына”, дзе яе гаспадар народны майстар Сяргей Шчэрба правёў майстар-клас па ганчарстве.
Тэкст і фота Анны АНІШКЕВІЧ, газета “Пастаўскі край”