З 9 па 14 верасня галоўныя заатэхнік і ветурач ААТ «Хацілы-агра» Расціслаў Хацяновіч, Віктар Радзевіч, загадчыцы ферм «Навасёлкі» і «Коўзаны» ААТ «Навасёлкі-Лучай» Валянціна Мацур і Вікторыя Вартазаран прымалі ўдзел у рабоце Школы малочнай жывёлагадоўлі ў Берліне.
Паехаць на вучобу ў Германію прапанавалі прадстаўнікі кампаніі Alltech. Яна спецыялізуецца на распрацоўцы экалагічных навуковых рашэнняў для надзённых праблем сельскагаспадарчай і харчовай індустрыі, з’яўляецца сусветным лідарам у галіне кармлення і здароўя жывёлы. З ёй кіраўніцтва абедзвюх гаспадарак супрацоўнічае даўно (кансультуецца, атрымлівае карысныя парады), таму і запрашэнне на вучобу прынялі з радасцю.
У Беларусі была сфарміравана група з 12 чалавек, якая 9 верасня вылецела з Мінска ў Берлін, 10-га школа распачала работу. У ёй прымалі ўдзел прадстаўнікі малочнай галіны, спецыялісты па кармленні і ветэрынарыі, кіраўнікі гаспадарак з Казахстана, Расіі і Беларусі. Асноўная ўвага была ўдзелена кармленню жывёлы ў транзітны перыяд — час пераходу каровы ад адной лактацыі да другой. Разглядаліся падыходы да вырошчвання маладняку з мэтай атрымання высокаўдойнай каровы пасля ацёлу. Абмяркоўваліся метады работы з жывёлай, тэхналогіі яе кармлення, прынцыпы і падыходы да бялковага і мінеральнага харчавання фізіялагічных груп. Перад прысутнымі выступалі еўрапейскія і расійскія кансультанты.
Заняткі па тэорыі спалучаліся з практычнымі. Яны праводзіліся на дзвюх фермах. На адной з іх удзельнікам школы было цікава даведацца пра выпрацоўку з гною біягазу, які з’яўляецца аналагам прыроднага газу і служыць палівам для атрымання розных відаў энергіі. Для гэтага выкарыстоўваюцца спецыяльныя ўстаноўкі, якія працуюць незалежна ад знешніх фактараў (надвор’я, сезоннасці) у кругласутачным і круглагадовым цыклах. Вытворчаць біягазу дазваляе забяспечваць уласныя патрэбы фермера ў цеплавой і электраэнергіі пры нізкім яе сабекошце.
У вольны ад заняткаў час арганізоўваліся экскурсіі па Берліне. Была магчымасць пагутарыць з калегамі з іншых краін, пераняць іх вопыт.
Анна АНІШКЕВІЧ, газета “Пастаўскі край”.
Фота з асабістага архіва Вікторыі Вартазаран