Святкуе шосты гарадок

Традыцыйнае свята ў мікрараёне вуліцы Зялёнай у райцэнтры адбудзецца ў ня­дзелю, 21 жніўня. Пачнецца яно ў 10.00 спартыўнымі спаборніцтвамі па пляжным валейболе (пляж возера Задзеўскае), а прадоўжыцца ў 12.00 спаборніцтвамі па  настольным тэнісе і більярдзе (маладзёжны цэнтр “Юнацтва”); з 16.00 длямаленькіх жыхароў мікрараёна ладзіцца дзіцячая тэатралізаваная забаўляльная праграма (МЦ “Юнацтва”).

У 18.00 у сасонніку распачнецца тэматычная праграма. Падчас яе будуць ушанаваны мнага­дзетныя сем’i, юбіляры, маладажоны, старажылы і самыя маленькiя жыхары. Паказальныя выступленні прадэманструюць супрацоўнікі аддзела па надзвычайных сітуацыях, а таксама Пастаўскага аддзялення Дэпартамента аховы МУС Рэспублікі Беларусь са службовым сабакам, будзе магчымасць паўдзельнічаць у спаборніцтвах па дартсе.  

У 19.30  — канцэрт народнай эстраднай групы “25 плюс-мінус”, пасля яго — дыскатэка.
Будзе працаваць выязны гандаль, прысутныя пачастуюцца салдацкай кашай з палявой кухні.

Арганізацыйны камітэт