У адпаведнасці з распараджэннем раённага выканаўчага камітэта, на Пастаўшчыне вядзецца падрыхтоўка да святкавання 71-й гадавіны Перамогі савецкага народа ў Вялікай Айчыннай вайне.
Галоўныя ўрачыстасці адбудуцца 9 мая на плошчы Леніна ў Паставах. У 9.30 адсюль стартуе аўтапрабег “Памяці загінулых герояў”. У 10.30 адбудзецца святочнае шэсце калон працоўных калектываў горада, моладзі і ваеннаслужачых Пастаўскага ваеннага гарнізона, якое затым перанясецца на плошчу, дзе ў 11.00 распачнецца мітынг-рэквіем з ускладаннем вянкоў і кветак да магілы загінулых воінаў. У 11.30 — канцэрт “І адклікнецца ў сэрцы кожнага Перамога”, у якім прымуць удзел лепшыя калектывы мастацкай самадзейнасці і салісты. Будуць арганізаваны паказальныя выступленні Пастаўскага аддзялення Дэпартамента аховы.
Актыўны ўдзел у святкаванні прыме моладзь. 8 мая на пляцоўцы каля кінатэатра ўдзельнікі дзіцячай вакальнай студыі цэнтра культуры і народнай творчасці выступяць з канцэртнай праграмай “Спявае пераможная вясна”, а 9 мая па вул. 17 Верасня (ад плошчы Леніна да плошчы Камсамольскай) з 10.00 да 11.00 вучні школы мастацтваў імя А. Ромера прадэманструюць сваю творчасць у малюнках на асфальце. У 11.00 на плошчы Леніна лепшыя навучэнцы школ будуць прыняты ў піянеры. З 22.00 да 24.00 адбудуцца маладзёжная акцыя “Мы памятаем” і дыскатэка.
Урачыстыя мерапрыемствы, прысвечаныя чарговай гадавіне Вялікай Перамогі, пройдуць у працоўных і вучнёўскіх калектывах, установах культуры па ўсім раёне.