У пятніцу ў мікрараёне вуліцы Юбілейнай адкрыўся пяты па ліку ў райцэнтры фірменны магазін Пастаўскага малочнага завода.
Старшыня раённага выканаўчага камітэта Сяргей Васільевіч Чэпік, які прысутнічаў на ўрачыстасці, адзначыў: “Заўсёды прыемна адкрываць новыя аб’екты. Упэўнены, што магазін крокавай даступнасці будзе запатрабаваны, прывабіць пакупнікоў шырокім асартыментам тавараў, іх якасцю, даступнымі цэнамі”.
У “Малочным раі” можна купіць не толькі малочныя прадукты, але і хлебабулачныя, мясныя, рыбныя, кандытарскія вырабы. Жыхары новаму магазіну рады. На адкрыццё прыйшло шмат людзей. Першыя дзесяць пакупнікоў атрымалі ў падарунак наборы прадукцыі малочнага завода, тыя, хто набываў тавараў больш чым на пяць рублёў, — памятныя сувеніры. Бойка ішла дэгустацыя. Многія, пакаштаваўшы сыры, малако, смятану, накіроўваліся ў магазін менавіта за ацэненай прадукцыяй. Дзяцей забаўлялі вясёлыя клоўны.
“Малочны рай” працуе з 8 да 23 гадзін без выхадных і перапынку на абед. Выручка ў дзень адкрыцця склала больш за 43 тысячы рублёў, у нядзелю — больш за 30.
Тэкст і фота Анны АНІШКЕВІЧ