У мінулую пятніцу ў нашым раёне пабывалі памочнік Прэзідэнта Рэспублікі Беларусь — галоўны інспектар па Віцебскай вобласці Аляксандр Рыгоравіч Пазняк, дырэктар сумеснага кітайска-беларускага таварыства з абмежаванай адказнасцю “СИГИКОП-Бел” Ян Ліцзэ і яго намеснік Лу Гопін.
У суправаджэнні старшыні раённага выканаўчага камітэта Віктара Сяргеевіча Гутарава яны наведалі ПВУП “Пастаўскі мэблевы цэнтр”, дзе сустрэліся з яго дырэктарам Анатоліем Міхайлавічам Бабічавым і азнаёміліся з работай прадпрыемства.
Прадстаўляючы дзелавых кітайскіх гасцей, памочнік Прэзідэнта Рэспублікі Беларусь А. Р. Пазняк адзначыў, што галаўная кампанія па міжнародным тэхніка-эканамічным супрацоўніцтве была заснавана ў 1970 годзе ў правінцыі Ганьсу Кітайскай Народнай Рэспублікі. Яна ажыццяўляе сваю дзейнасць больш чым у 40 краінах Азіі, Афрыкі і Акіяніі ў сферы фінансавання, выканання праектаў па дагаворах падраду, тэхнічным і супрацоўніцтве ў сферы працоўных паслуг і гандлю. За гэты час кампанія рэалізавала вялікую колькасць праектаў, якія адпавядаюць сусветным стандартам. У Беларусі яна прадстаўлена ТАА “СИГИКОП-Бел”, якую, у прыватнасці, зацікавіла вытворчасць дзвярэй з натуральнай драўніны на Пастаўскім мэблевым цэнтры. Гэты від дзейнасці і стаў прадметам перамоў па наладжванні кантактаў.
Кітайскі бок убачыў Пастаўскі мэблевы цэнтр як сур’ёзнага вытворцу прадукцыі, якая на сённяшні дзень рэалізуецца ў 26 краін свету. У апошнія два гады вельмі актыўна асвойваецца рынак Саудаўскай Аравіі, Аб’яднаных Арабскіх Эміратаў, Кувейта, Ірака і іншых краін. Напрыклад, толькі ў Паўднёва-Афрыканскую Рэспубліку прадпрыемствам будзе пастаўлена 80 тысяч дзвярэй.
Уся прадукцыя Пастаўскага мэблевага цэнтра вырабляецца з натуральнага масіву. Яе цана залежыць ад віду драўніны (а гэта сасна, вольха, арэх і дуб). Найбольшым попытам карыстаюцца вырабы сярэдняга сегмента, кошт якіх задавальняе заказчыкаў.
Падчас перамоў закраналіся пытанні лагістыкі, мытнага афармлення, асартыменту і іншыя. Нямала іх узнікла пры наведванні асноўнай вытворчасці, дзе на ўсіх яе этапах задзейнічана высокатэхналагічнае абсталяванне. Госці прайшлі па ўсіх цэхах і цікавіліся найперш якасцю работ, і яна задаволіла. Затрымаліся і ў выставачнай зале, дзе прадстаўлены асноўныя ўзоры гатовай прадукцыі: ад самай таннай да дарагой. Убачанае ўразіла кіраўніцтва сумеснага кітайска-беларускага таварыства. Добрыя ўражанні засталіся ў гасцей ад наведвання новай фабрыкі па вырабе паркетнай дошкі. Тут, хаця яшчэ і працягваецца мантаж абсталявання, ужо атрыманы першыя ўзоры новай прадукцыі.
Каля трох гадзін доўжылася знаёмства з дзейнасцю найбуйнейшага не толькі на Пастаўшчыне, але і ў Беларусі прыватнага прадпрыемства. Прадстаўнікі кітайскага боку шчыра дзякавалі афіцыйным асобам і кіраўніцтву цэнтра за прадастаўленую магчымасць убачыць працэс вырабу прадукцыі, ацаніць яе якасць і выказалі зацікаўленасць у наладжванні практычнага супрацоўніцтва.
Тэкст і фота Пятра КУРЫЛОВІЧА