З 22 па 25 студзеня ў абласным цэнтры праходзілі "Алімпійскія дні моладзі" Віцебскай вобласці па ўсіх відах спорту сярод юнакоў 1999 года нараджэння і маладзей. Пастаўчане прынялі ўдзел у спаборніцтвах па валейболе і паказалі выдатны вынік.
У склад пастаўскай каманды ўвайшлі выхаванцы дзіцяча-юнацкай спартыўнай школы Арцём Бандарэнка, Дзяніс Радзевіч, Андрэй Казлоўскі, Аляксандр Каспер, Максім Іваноў, Арсеній Шнітоўскі, Ігар Скур'ят і Дзяніс Януш, а таксама Аляксей Лабуць, які зараз вучыцца ў рэспубліканскім дзяржаўным вучылі¬шчы алімпійскага рэзерву. Трэнер каманды — Генадзь Генадзьевіч Савосін.
У спаборніцтвах удзельнічалі 6 каманд, ігры праходзілі па кругавой сістэме. Нашы хлопцы паказалі выдатную гульню і не саступілі сапернікам ні ў адной сустрэчы, абыграўшы равеснікаў з Віцебска, Верхнядзвінска і Бешанковічаў з лікам 3:0, а аршанцаў і шумілінцаў — 3:1.
— Для нас «Алімпійскія дні моладзі» — гэта галоўныя спаборніцтвы года, таму атрымаць на іх перамогу ўдвая прыемна. Спадзяюся, што юнакі таксама ўдала выступяць і на рэспубліканскім этапе, пакажуць усё, на што здольныя і чаму на працягу многіх гадоў іх вучыў трэнер Генадзь Генадзьевіч Савосін, — дзяліўся гонарам за прадстаўнікоў пастаўскай валейбольнай школы яе дырэктар Павел Вавінскі.
Валейбалісты ўзнагароджаны дыпломамі, медалямі і Кубкам. Акрамя гэтага, на аснове каманды бу¬дзе сфарміравана зборная вобласці, якая прыме ўдзел у рэспубліканскіх спаборніцтвах. Яны адбудуцца ў Мінску 16—20 лютага.
Вераніка ФІЛАНОВІЧ