Другі год запар выхаванцы трэнера па футболе Васілія Мікітавіча Грантоўскага сталі прызёрамі прэстыжнага спартыўнага турніру. На гэты раз каманда футбалістаў «ПМЦ» 2003-2004 гадоў нараджэння заняла другое месца ў сярэдняй узроставай групе ў фінальных рэспубліканскіх спаборніцтвах сярод дзяцей і падлеткаў па футболе «Скураны мяч» на прызы Прэзідэнцкага спартыўнага клуба.
Перад пачаткам турніру адбылася жараб’ёўка, па выніках якой каманды-ўдзельніцы былі падзелены на дзве групы. Нашымі сапернікамі ў аднакругавым турніры сталі каманды «Віцязь» з Мінска, «Тарпеда» (Магілёў) і «Надзея» (Іўеўскі раён Гродзенскай вобласці). Пра ўзровень гульні і запалу ў групе «В», у якую трапілі пастаўскія футбалісты, можна меркаваць хоць бы па тым факце, што тры каманды з чатырох з’яўляліся прызёрамі мінулагодняга «Скуранога мяча». Таму кожная гульня для нашых хлопцаў была як фінальная. Спартыўная барацьба з годнымі сапернікамі скончылася перамогай «ПМЦ»: мінчан разграмілі з лікам 6:2, каманда гродзенскай вобласці, хоць і саступіла з лікам 1:6, забяспечыла двухбакова вострую гульню, а ў завяршальным круг матчы магіляўчане прайгралі з лікам 0:1. За пяць хвілін да фінальнага свістка левы абаронца Дзмітрый Рогач забіў вырашальны гол у вароты каманды «Тарпеда» і забяспечыў «ПМЦ», як мінімум, другую прыступку п’едэстала. Але пастаўчане мелі цвёрды намер паўтарыць свой мінулагодні аглушальны поспех і зноў завалодаць Кубкам. У фінальным паядынку з драгічынскім «Юнацтвам» яны стварылі, па меншай меры, пяць небяспечных момантаў каля варот сапернікаў, але так і не змаглі іх рэалізаваць. У выніку ўзяцце варот адбылося толькі ў серыі пасляматчавых пенальці, у якой і вызначыўся вынік паядынку — 4:3 на карысць прадстаўнікоў Брэсцкай вобласці.
Падчас турніру таксама праводзіліся спаборніцтвы па тэхніцы валодання мячом і фізпадрыхтоўцы. У агульнакамандным заліку наша каманда без асаблівых намаганняў заняла трэцяе месца (спаборніцтвы па бегу на 30 метраў, падцягванні, укідванні мяча, ударах на далёкасць, дакладнасць і хуткасць праводзіліся ў першы дзень турніру, таму на поўную не выкладваліся — бераглі сілы для гульні на полі). Па выніках асноўных спаборніцтваў Кірыл Каралёнак прызнаны лепшым паўабаронцам. Трэба сказаць, што ён не толькі абараняў свае, але і атакаваў вароты сапернікаў: на яго рахунку некалькі галявых перадач і 4 галы. Прызёры турніру ўзнагароджаны дыпломамі, медалямі, Кубкам, міні-кубкамі і каштоўнымі прызамі. Сярод апошніх — фотаапарат, пяць футбольных мячоў і 14 тэрмасаў.
Вераніка ФІЛАНОВІЧ