Паехалі на вобласць

У канцы лютага завяршыўся першы этап рэспубліканскага конкурсу на лепшы дзіцячы малюнак на экалагічную тэматыку. У ім прынялі ўдзел хлопчыкі і дзяўчынкі ад 6 да 10 гадоў. Наш раён актыўна ўключыўся ў спаборніцтва, было прадстаўлена каля 20 работ навучэнцаў Пастаўскай дзіцячай школы мастацтваў імя А. Ромера.

26 лютага былі падведзены вынікі раённага этапа конкурсу. У склад судзейскай калегіі ўваходзіла 5 чалавек: начальнік Пастаўскай райінспекцыі прыродных рэсурсаў і аховы навакольнага асяроддзя Мікалай Лысёнак, галоўны спецыяліст аддзела ідэалагічнай работы, культуры і па справах моладзі райвыканкама Ірына Лойка, дырэктар дзіцячай школы мастацтваў імя А. Ромера Жанна Курдо, карэспандэнт рэдакцыі газеты «Пастаўскі край» Наталля Налей і галоўны спецыяліст райінспекцыі прыродных рэсурсаў і аховы навакольнага асяроддзя Аляксандр Гатоўчык.

Пераможцай раённага этапа конкурсу прызнана Вікторыя Куцуха з работай «Залатая восень». Другое месца падзялілі Анастасія Дарафейчык («Поры года») і Дар’я Шылей («Пастаўскі пейзаж»). Трэцяе занялі Уладзіслаў Дзісько («Дзіўная сустрэча») і Аляксандр Макруш («Вясёлая сямейка»).

Усе работы адпраўлены ў Віцебск для ўдзелу ў абласным этапе рэспубліканскага конкурсу на лепшы дзіцячы малюнак на экалагічную тэматыку.

Тэкст і фота Наталлі Налей