У канцы мая на базе дзяржаўнай авіяцыйнай аварыйна-выратавальнай установы "Авіяцыя" Міністэрства па надзвычайных сітуацыях Рэспублікі Беларусь прайшоў раённы этап ваенна-спартыўнай гульні «Зарніца», прысвечанай 72-й гадавіне Вялікай Перамогі. Удзел у спаборніцтвах прынялі каманды пяці гарадскіх і Камайскай сярэдніх школ.
Удзельнікаў спартыўных стартаў вітаў галоўны спецыяліст штаба авіяцыйнага атрада Сяргей Цяляк. Ён пажадаў усім выдатнага настрою, спартыўнага азарту і ўдачы. Узняць Дзяржаўны флаг ва ўрачыстай абстаноўцы было даручана капітану мінулагодняй каманды-пераможцы СШ № 4 Вікторыі Смятанка.
І вось каманды на агнявым рубяжы. Першым этапам спаборніцтваў стала стральба з пнеўматычнай вінтоўкі. Юнакам і дзяўчатам неабходна было як мага дакладней трапіць у мішэнь з дзесяціметровай адлегласці. Найлепш гэта атрымалася ў Лізаветы Клянцэвіч (СШ №2), навучэнцаў СШ №3 Кацярыны Жук і Аляксандра Звяругі. У агульнакамандным заліку вызначыліся каманды другой, трэцяй і чацвёртай школ.
Наступны конкурс — двухкіламетровы марш-кідок з перашкодамі. Падчас яго камандзе з чатырох хлопцаў і трох дзяўчат трэба было ўстанавіць палатку, кінуць гранату ў дзесяціметровы калідор, разабраць і сабраць аўтамат, пераправіцца па бервяне і пераадолець паласу перашкод, якая ўключала “мышалоўку”, “купіны” і “ўчастак хімічнага забруджвання”. Апошні неабходна было пераадолець у процівагазах. Таксама ўдзельнікаў чакалі арыентаванне па азімуце са зменай напрамку і транспарціроўка “пацярпелага”. Найлепшы вынік у самым складаным конкурсе паказала каманда СШ №4 “Камбат”. Крыху адсталі ад яе прадстаўнікі трэцяй і Камайскай СШ.
Падчас творчага конкурсу на лепшы баявы лісток “Зарнічныя будні” прадстаўнікам каманд неабходна было адлюстраваць конкурсы і спаборніцтвы ваенна-спартыўнай гульні. Пры ацэнцы работ журы ўлічвала змястоўнасць, арыгінальнасць, мастацкае афармленне і разнастайнасць жанраў. Лепш за іншых гэтым крытэрыям адпавядалі баявыя лісткі каманд “Штык” (СШ №1), “Застава” (СШ №3) і “Экіпаж” (Камайская СШ).
Тэарэтычныя веды ўдзельнікі ваенна-спартыўнай гульні дэманстравалі ў конкурсе «Старонкі гісторыі Айчыны». Ён праводзіўся ў тэставай форме. Юнакам і дзяўчатам прапаноўвалася адказаць на пытанні пра асноўныя бітвы Вялікай Айчыннай вайны, гарады-героі, партызанскі рух, піянераў-герояў, палкаводцаў і военачальнікаў, што прымалі ўдзел у вызваленні Беларусі, пра сучасную беларускую армію, святы і ўзнагароды нашай краіны. На інтэлектуальным этапе спаборніцтваў перамогу святкавалі каманды “Зара” (СШ №2), першай і чацвёртай школ.
Конкурс строю і песні прадугледжваў ідэальнае выкананне ўсіх каманд, выразнасць і зладжанасць рухаў. Тут не было роўных камандам чацвёртай, першай і трэцяй школ. Як заўжды, азартным і захапляльным атрымаўся конкурс па перацягванні каната. У ім вызначыліся прадстаўнікі каманд “Зара”, “Экіпаж” і “Камбат”.
У агульным заліку наймацнейшай прызнана каманда СШ №4. На другім месцы — СШ №3, замкнула тройку прызёраў каманда СШ №2. Яны атрымалі граматы і падарункі ад райкама БРСМ. Таксама граматамі маладзёжнай арганізацыі ўзнагароджаны прызёры кожнага конкурсу (акрамя стральбы з пнеўматычнай вінтоўкі) — яны заахвочаны граматамі раённай арганізацыйнай структуры ДТСААФ. Праможцам марш-кідка, конкурсаў строю і песні і па перацягванні каната ўручаны памятныя падарункі ад аддзела ідэалагічнай работы, культуры і па справах моладзі райвыканкама.
Падзякамі за дапамогу ў арганізацыі правядзення гульні раённы камітэт ГА «БРСМ» адзначыў авіяцыйны атрад, радыётэхнічны цэнтр, ваенны шпіталь і пагранкамендатуру “Паставы”.
Вераніка ФІЛАНОВІЧ.
Фота Сяргея ВШЫЎКАВА