30 мая ў школах Пастаўшчыны, як і ўсёй Беларусі, прагучаў апошні званок. З гэтай нагоды прайшлі ўрачыстыя лінейкі, цікавыя сустрэчы, а вечарам на цэнтральнай плошчы горада адбыўся традыцыйны развітальны баль выпускнікоў.
Фото
Старшыня раённага выканаўчага камітэта Віктар Сяргеевіч Гутараў з пераможцамі і прызёрамі прадметных алімпіяд, іх настаўнікамі і бацькамі
Сёлета 257 юнакоў і дзяўчат cкончылі гімназію, пяць гарадскіх, Варапаеўскую, Гуцкую, Дунілавіцкую, Камайскую, Лынтупскую і Навасёлкаўскую сярэднія школы. Разам з адзінаццацікласнікамі на свяце прысутнічалі настаўнікі, бацькі, усе тыя, для каго школа была і застаецца другім домам. Пасля прадстаўлення выпускнікоў у неба ўзняліся дзясяткі рознакаляровых шароў, палёт якіх сімвалізаваў развітанне з дзяцінствам, узнёсласць мар, новыя надзеі і спадзяванні. Сапраўды, наперадзе рабят чакае шмат адкрыццяў, знаходак, няпростае, але такое цікавае жыццё. Многія ўступаюць у яго з трывалым багажом ведаў, настойліва ідуць да вызначанай мэты.
— Сёння мы з задавальненнем прызнаём, што настаўнікі раёна годна выканалі сваю задачу па навучанні і выхаванні школьнікаў, — адзначыў, вітаючы прысутных, старшыня раённага выканаўчага камітэта Віктар Сяргеевіч Гутараў. — Пра гэта сведчаць шматлікія перамогі навучэнцаў на раённых, абласных і рэспубліканскіх конкурсах, канферэнцыях і алімпіядах. Вось і ў гэтым навучальным годзе па выніках абласнога этапа рэспубліканскай алімпіяды пераможцамі па розных прадметах сталі 9 школьнікаў. Сярод сельскіх раёнаў Віцебскай вобласці па іх колькасці наш раён заняў другое месца. На заключным, рэспубліканскім, этапе прадметнай алімпіяды трое юных пастаўчан атрымалі дыпломы 1-й, 2-й і 3-й ступеняў.
Пераможцамі і прызёрамі прадметных алімпіяд сталі Ірына Паўлава, Кацярына Ясінская, Руслан Балай, Надзея Якімовіч, Дзяніс Арэх, Юлія Канаш, Яўгенія Лук’яненка, Мікіта Шастакоў і Яўгеній Казімірскі з СШ № 5, Варапаеўскай, Дунілавіцкай, Камайскай, №1 сярэдніх школ і гімназіі. Заслужана адзначана праца іх настаўнікаў Раісы Генадзьеўны Кашко, Мікалая Алегавіча Атрахімовіча, Ліліі Аляксандраўны Брэскай, Алены Пятроўны Макоўскай, Мікалая Уладзіміравіча Арэха, Леанарды Міхайлаўны Рамбальскай, Святланы Адэсьеўны Піскуновіч, Ірыны Мікалаеўны Козіч, Ігара Міхайлавіча Пракаповіча. Радаснымі і ўсхваляванымі адчувалі сябе і бацькі вучняў, якім былі ўручаны Падзячныя пісьмы раённага выканаўчага камітэта.
Павіншаваўшы ўзнагароджаных, а таксама ўсіх выпускнікоў з завяршэннем вучобы, В. С. Гутараў нагадаў, што адзінаццацікласнікаў чакаюць экзамены, паспяховая здача якіх дасць старт у дарослае, напоўненае новымі падзеямі і магчымасцямі жыццё. Кіраўнік раённай вертыкалі выказаў упэўненасць, што маладыя пастаўчане даб’юцца поспехаў, змогуць выбраць прафесію па душы, ажыццявіць свае мары і планы. Іх энергія юнацтва, веды і творчыя здольнасці патрэбны гораду, раёну, краіне.
В. С. Гутараў пажадаў выпускнікам паспяховай здачы экзаменаў, новых здзяйсненняў, падзякаваў настаўнікам за прафесіяналізм, педагагічны талент, душэўную шчодрасць, бацькам — за разуменне і дапамогу, цеснае супрацоўніцтва ў выхаванні дзяцей.
Большасць выпускнікоў ужо вызначыліся з выбарам свайго далейшага жыццёвага шляху. Пра гэта гаварыла ў сваім выступленні другі сакратар раённага камітэта грамадскага аб’яднання “БРСМ” Вераніка Казлоўская. Яна ўручыла 20 выпускнікам рэкамендацыі для паступлення ў Ваенную акадэмію Рэспублікі Беларусь, Інстытут пагранічнай службы краіны, Камандна-інжынерны інстытут Міністэрства па надзвычайных сітуацыях і Акадэмію Міністэрства ўнутраных спраў Рэспублікі Беларусь. Служыць у сілавых структурах выказалі жаданне Яўгеній Бурак, Гінтарас Вятрэнка, Андрэй Дзянісаў, Дзяніс Зямчонак, Уладзіслаў Кузьміч, Міхаіл Мініковіч, Максім Шунькоў, Аляксей Іўчанка, Яўгеній Ермакоў і іншыя. Сур’ёзна рыхтуюцца апрануць форму курсантаў і дзяўчынкі: Марыя Дунец, Карына Казека, Яна Руткоўская, Іна Собаль, Аляксандра Дарашкевіч.
Школа дае вучням не толькі веды па агульнаадукацыйных прадметах. Яна дапамагае дзецям раскрыць свае таленты, праявіць сябе ў творчасці, спорце, грамадскім жыцці. Пераважная большасць юнакоў і дзяўчат з’яўляюцца членамі Беларускага рэспубліканскага саюза моладзі, праяўляюць сябе як лідары, арганізатары і выканаўцы многіх карысных спраў. На балі выпускнікоў 35 актывістам раённай арганізацыі БРСМ Вераніка Казлоўская ўручыла Падзякі раённага камітэта. У ліку іншых іх атрымалі Надзея Русак, Анастасія Праліч, Надзея Гір’ят, Сяргей Семянас, Марыя Дунец, Арцём Бандарэнка, Аляксей Канаш, Дзяніс Лукашэвіч, Кірыл Працуковіч, Карына Блашко і іншыя.
Свае таленты і здольнасці выпускнікі і іх малодшыя сябры дэманстравалі на працягу ўсёй святочнай праграмы. Парадавалі музычнымі падарункамі трыо Варапаеўскай СШ, вакальныя групы раённага цэнтра дзяцей і моладзі, Камайскай і СШ №3, салісты Анастасія Вырвіч (Гуцкая СШ), Аляксандра Дарашкевіч (СШ №1), Алег Жаўноў (раённы цэнтр дзяцей і моладзі), Дар’я Румянцава (СШ №4), Аляксандра Шарынская, Данііл Зямчонак (Дунілавіцкая СШ), Карына Блашко, Яна Руткоўская (Лынтупская СШ) і іншыя. У іх выкананні прагучалі песні пра апошні званок, нашу Беларусь, цудоўную пару — юнацтва, веснавую квецень. Арыгінальным атрымалася выступленне выпускнікоў гімназіі, якія “запалілі” сімвалічныя зоркі ў гонар дзяцінства, настаўнікаў, школьнага жыцця, аднакласнікаў, бацькоў, роднай школы, у гонар сваёй будучыні і вялікіх спраў, якія абавязкова здзейсняць.
Незвычайны падарунак паднеслі сваім аднагодкам і ўсім удзельнікам мерапрыемства выпускнікі СШ №2, якія выпусцілі ў неба белых галубоў. А вядучыя свята Лізавета Галаўко і Уладзіслаў Касцень якраз у гэты момант параўноўвалі школьныя гады з палётам птушак. Яны праляцелі імкліва, акрэсліўшы шлях у новае жыццё. А пачалося яно з апошняга званка, развітальнага школьнага вальса. Пад вечна маладую мелодыю танцавалі не толькі выпускнікі, але і іх бацькі, настаўнікі. Гэты момант быў і застаецца адным з самых хвалюючых. Вальс клікаў юнакоў і дзяўчат у заўтрашні дзень, каб перамагаць, прымаць правільныя рашэнні, смела адчыняць дзверы ў краіну новых ведаў, сустрэч і знаёмстваў.
У добры шлях, выпускнікі!
Пётр КУРЫЛОВІЧ