Кожнаму класу – першакласныя веды

Сельскія вучні не менш таленавітыя і перспектыўныя, чым гарадскія. Гэта каторы год запар пацвярджа­юць школьнікі з Варапаева, паказваючы на раённых і абласных этапах алімпіяд вельмі высокія вынікі.

Такі поспех — заслуга вопытнага, зладжанага педкалектыву, які варты гонару і ўвагі. Пра гэта, выступаючы на ўрачыстай лінейцы ў Варапаеўскай СШ, гаварыў старшыня райвыканкама Сяргей Чэпік. Ён стаў удзельнікам сапраўднага свята ведаў, якое прайшло ярка і творча.

З-за неспрыяльнага надвор’я лінейка адбылася не ў школьным двары, як звычайна, а ў актавай зале. Гасцямі мерапрыемства, акрамя Сяргея Чэпіка, былі старшыня Варапаеўскага сельскага Савета Іна Касарэўская, старшы механік Варапаеўскай дыстанцыі пуціІгар Статута, дырэктар мясцовай дзіцячай школы мастацтваў імя І. Сушко Ігар Гваздзеўскі і іншыя.

 Першым перад педагогамі, вучнямі, іх роднымі выступіў гаспадар школы — яе дырэктар Віктар Жук.

— Здаецца, толькі ўчора мы падводзілі вынікі мінулага навучальнага года і на свяце апошняга званка жадалі паспяховай здачы іспытаў нашым выпускнікам, — гаварыў Віктар Мікалаевіч. — Час праляцеў хутка, і яны ўжо студэнты. 12 чалавек з ліку выпускнікоў (а гэта 70% класа) паступілі ў вышэйшыя навучальныя ўстановы, астатнія — у сярэднія. Вучні былі моцныя, у многім дзякуючы ім летась школа добра праявіла сябе на раённым этапе алімпіяд: па агульнай колькасці прызавых месцаў мы саступілі толькі гімназістам. А вясеннія алімпіяды для 7—8 класаў паказалі, што падрастае годная змена выпускнікам, што і ў меншых школьнікаў ёсць патэнцыял. Спадзяюся, нам удасца не толькі паўтарыць, але і перавысіць дасягненні, якія ў нас раней былі.

Віктар Мікалаевіч таксама падзякаваў школьнікам, якія ў складзе вучнёўскіх брыгад правялі вялікую работу па падрыхтоўцы школы да новага навучальнага года. Удзельнічалі ў рамонце і бацькі, і яны таксама заслужылі слоў удзячнасці.

Дырэктар школы ўручыў па­дзяку вучаніцы 11 класа, валанцёру атрада «Добрае Сэрца» Аляксандры Зябчанцы і членскія білеты БРСМ навічкам арганізацыі. Затым слова ўзяў Сяргей Чэпік.

— Думаю, многія з 11-класнікаў ужо вызначыліся, па якім шляху ісці далей, — адзначыў Сяргей Васільевіч. — Спадзяюся, што гэты выбар правільны. Калі яшчэ сумняваецеся, куды паступаць, добра падумайце наконт сельскагаспадарчых спецыяльнасцей. У нашай краіне патрэбны людзі ўсіх прафесій. Не абавязкова ўсім быць «айцішнікамі», хтосьці павінен вырошчваць хлеб і карміць краіну. Я ніколі не саромеўся, што скончыў сельскагаспадарчую ВНУ, працаваў у гэтай галіне. Так, праца на зямлі няпростая, але вельмі патрэбная ў нашай аграрнай краіне.

Да свята ведаў старшыня райвыканкама падарыў школе 11 сістэмных блокаў для кабінета інфарматыкі. Для вучняў гэты падарунак вельмі каштоўны, бо камп’ютарнаму класу было вельмі патрэбна перааснашчэнне: ранейшая тэхніка не дазваляла ў поўнай меры выконваць праграму навучання па інфарматыцы.

Падарункі ў той дзень атрымалі і 22 першакласнікі. Сяргей Чэпік разам з іншымі ганаровымі гасцямі ўручыў ім кнігі «Беларусь — наша Радзіма», а выпускнікі парадавалі малых размалёўкамі, канцтаварамі, кнігамі…

Першакласніца і выпускнік далі першы званок — і неўзабаве вучні і настаўнікі разышліся па класах. Першы ў новым навучальным годзе ўрок для варапаеўцаў, як і для ўсіх школьнікаў краіны, меў назву «У адзінстве беларускага народа — аснова незалежнасці краіны» і быў прысвечаны Году народнага адзінства. Гэтыя словы былі напісаны і на дошцы ў класе, дзе пасля лінейкі сабраліся старшакласнікі. Настаўнікі геаграфіі і беларускай мовы і літаратуры Аляксандр Гарны і Мікалай Атрахімовіч прапанавалі падлеткам інтэлектуальную гульню на гістарычную тэму.

Сёлетняе свята ведаў таксама ўжо гісторыя. Пазаўчора ў педагогаў і вучняў пачаліся напружаныя, але разам з тым насычаныя радасцямі школьнага жыцця дні. Няхай іх уновым навучальным годзе будзе як мага больш.

Іна Сняжкова, газета “Пастаўскі край”. Фота аўтара