8 красавіка ў вялікай зале пасяджэнняў райвыканкама адбылося сумеснае пасяджэнне прэзідыума раённага Савета дэпутатаў і Маладзёжнай палаты пры гэтым органе ўлады. Разам яны абмеркавалі, наколькі паспяхова на Пастаўшчыне ажыццяўляецца рэалізацыя маладзёжнай палітыкі.
Асноўным дакладчыкам па гэтай тэме выступіла начальнік аддзела ідэалагічнай работы, культуры і па справах моладзі райвыканкама Галіна Мікалаеўна Чаплінская. Яна паведаміла, што ў нашым раёне пражывае каля сямі тысяч жыхароў ва ўзросце ад 14 да 31 года, што складае 18% ад агульнай колькасці насельніцтва. З іх у горадзе — 4944 чалавекі, у сельскай мясцовасці — 1798.
У рабоце з моладдзю асаблівая ўвага надаецца грамадзянска-патрыятычнаму і маральнаму выхаванню, прапагандзе здаровага ладу жыцця і арганізацыі вольнага часу. З гэтай мэтай праводзяцца розныя тэматычныя акцыі і мерапрыемствы: аўтапрабег «Памяці загінуўшых герояў», дзіцяча-юнацкае свята выяўленчага мастацтва «Перамога вачамі дзяцей», раённы турыстычны злёт моладзі, пазнавальная праграма «Мая Радзіма — Беларусь», спартыўнае мерапрыемства «Я ў армію пайшоў бы, няхай мяне навучаць», акцыі «Бессмяротны батальён», «Зорка Перамогі», «Мы — грамадзяне Беларусі», «Праспяваем Гімн разам», «За любімую Беларусь!», «Дзень прызыўніка», «Памяць», «Разам за моцную і квітнеючую Беларусь» і іншыя. Сталі традыцыйнымі рэспубліканскія і раённыя маладзёжныя суботнікі па добраўпарадкаванні горада, навядзенні парадку каля помнікаў і на воінскіх пахаваннях. У цэлым у год праводзіцца звыш пяцідзесяці раённых мерапрыемстваў.
Адным з напрамкаў дзяржаўнай маладзёжнай палітыкі з’яўляецца падтрымка маладых сем’яў. З гэтай мэтай у раёне чацвёрты год запар праводзіцца адкрыты сельскагаспадарчы конкурс сярод маладых сем’яў, якія пражываюць у сельскай мясцовасці «Майстры вёскі». Да ўдзелу ў ім запрашаюцца і маладыя сем’і з гарадоў-пабрацімаў Пастаў. Конкурс закліканы не толькі паказаць прыклад дружнай, творчай і актыўнай сям’і, але і спрыяць папулярызацыі сельскагаспадарчай працы.
Яшчэ адзін важны напрамак у рабоце з моладдзю — ахова грамадскага парадку. Пры сельвыканкамах, арганізацыях і прадпрыемствах раёна створана 21 добраахвотная дружына па аказанні дапамогі органам унутраных спраў Рэспублікі Беларусь і 5 добраахвотных дружын па аказанні дапамогі ў ахове Дзяржаўнай граніцы органам пагранічнай службы Рэспублікі Беларусь. Летась дружыннікі неаднаразова ўзнагароджваліся Падзякай старшыні Дзяржаўнага пагранічнага камітэта Рэспублікі Беларусь Л. С. Мальцава, старшыні Пастаўскага раённага выканаўчага камітэта В. С. Гутарава, камандзіра вайсковай часці 2044 А. І. Маркевіча і начальнікаў пагранзаставы. Прадугледжаны меры матэрыяльнага заахвочвання дружыннікаў: даплата за выхад на дзяжурства, прадастаўленне адгулаў і дадатковых дзён для адпачынку. Праводзяцца раённыя і абласныя спаборніцтвы сярод добраахвотных дружын. З 2012 года праходзіць штогадовы агляд-конкурс на званні «Лепшы грамадскі пункт аховы правапарадку», «Лепшы дружыннік» і «Лепшая добраахвотная дружына».
Моладзь Пастаўшчыны дасягнула значных вынікаў у творчасці, навуцы, мастацтве. 546 школьнікаў з усіх устаноў адукацыі лічацца ў спісах таленавітай моладзі раёна. У гэтым навучальным годзе тры навучэнкі раёна занялі прызавыя месцы ў заключным этапе рэспубліканскай алімпіяды па вучэбных прадметах. Выхаванцы школ мастацтваў раёна займаюць прызавыя месцы ў міжнародных, рэспубліканскіх і абласных конкурсах і фестывалях. Шэсць навучэнцаў Пастаўскай школы мастацтваў імя А. Тызенгаўза з’яўляюцца стыпендыятамі фонду Прэзідэнта Рэспублікі Беларусь па падтрымцы таленавітай моладзі.
Каб дапамагчы юнакам і дзяўчатам лепш сарыентавацца ў выбары навучальных устаноў і прафесій, запатрабаваных на рынку працы, аддзелам ідэалагічнай работы, культуры і па справах моладзі на вясенніх канікулах праводзіцца прафарыентацыйны злёт для выпускнікоў базавых і сярэдніх агульнаадукацыйных школ.
Штогод у раён прыбывае больш за 130 маладых спецыялістаў. Вядзецца мэтанакіраваная работа па іх адаптацыі на першых працоўных месцах і наступным замацаванні на Пастаўшчыне. Для гэтага арганізуюцца сустрэчы з кіраўніцтвам раёна, тэматычныя вечары, праводзіцца маладзёжны форум. Маладыя спецыялісты, якія ў поўнай ступені здолелі праявіць свае прафесійныя навыкі і арганізатарскія здольнасці, уключаюцца ў перспектыўны кадравы рэзерв. Зараз у iм знаходзяцца 38 маладых людзей ва ўзросце да 31 года. Сярод найбольш адораных маладых спецыялістаў праводзіцца конкурс прафесійнага майстэрства «Шлях да поспеху». У калектыўных дагаворах многіх прадпрыемстваў і арганізацый прадугледжаны шэраг ільгот і дадатковых выплат маладым спецыялістам, работнікам, якія вучацца на завочнай форме навучання, маладым сем’ям у сувязі з уступленнем у шлюб і нараджэннем дзіцяці, наймам і будаўніцтвам жылля.
Больш падрабязна пра рэалізацыю маладзёжнай палітыкі ў зоне сваёй адказнасці расказалі дырэктар Гуцкай СШ Іна Генадзьеўна Касарэўская і першы сакратар райкама БРСМ Іна Каралёва. З вынікамі дзейнасці Маладзёжнай палаты пры раённым Савеце дэпутатаў азнаёміла яе старшыня Лізавета Галаўко. Маладзёжнае аб’яднанне існуе крыху больш за год. За гэты час яго актывісты прынялі ўдзел у розных праектах, мерапрыемствах, акцыях і спартыўных турнірах, удзельнічалі ў жыцці школы і раёна, займаліся дабрачыннай дзейнасцю. За асабісты ўклад ва ўдасканаленне маладзёжнай палітыкі Лізавета Галаўко ўзнагароджана Ганаровай граматай раённага Савета дэпутатаў.
Паколькі сёлета Ліза заканчвае школу і не зможа ў далейшым курыраваць дзейнасць Маладзёжнай палаты, адбыліся датэрміновыя выбары новага старшыні. Ім стала навучэнка СШ №3 Кацярына Мацюшонак. Яна — сапраўдны лідар і прыклад для аднагодкаў. Каця выдатна вучыцца, актыўна ўдзельнічае ў алімпіядах па розных прадметах, школьных і раённых мерапрыемствах, ініцыятыўная і мэтанакіраваная.
Разам з Лізаветай Галаўко са складу Маладзёжнай палаты па прычыне заканчэння сёлета школы выйшлі і іншыя яе члены. Іх месца занялі 16 новых актывістаў. Старшыня раённага Савета дэпутатаў Віктар Пятровіч Арэхаў уручыў ім спецыяльныя пасведчанні.
Тэкст і фота Веранікі ФІЛАНОВІЧ