З трэцяга па восьмага верасня ў Мінску праходзіў юбілейны, дваццаты, фінал спаборніцтваў сярод дзяцей і падлеткаў па футболе “Скураны мяч” на прызы Прэзідэнцкага спартыўнага клуба. У сярэдняй узроставай групе бронзавым прызёрам турніру стала каманда пастаўчан “Патрыёт” (на здымку з трэнерам Аляксандрам Аляксандравічам Тарасевічам).
За першынство ў сярэдняй узроставай групе змагаліся хлопчыкі 2005-2006 гадоў нараджэння з васьмі футбольных каманд: “Фартуна” (Мінск), “Алімпія” (Мінск), “Патрыёт” (Паставы, Віцебская вобласць), “Азімут” (Драгічынскі раён, Брэсцкая вобласць), “Росквіт” (Бабруйск, Магілёўская вобласць), “Ніва” (Жыткавіцкі раён, Гомельская вобласць), “Узда” (Уздзенскі раён, Мінская вобласць) і “Фарсаж” (Лідскі раён, Гродзенская вобласць).
Менавіта з рук легенды беларускага футбола экс-галкіпера нацыянальнай зборнай, а цяпер аднаго з яе трэнераў Юрыя Жаўнова атрымалі камандны Кубак, персанальныя Кубкі, медалі, дыпломы і сувеніры пастаўчане Максім Раманоўскі, Мікіта Зелянкевіч (капітан), Кірыл Цыунель, Глеб Касенка, Кірыл Урбанайць, Мікіта Ерамееў, Крысціян Дзеўгуць, Максім Шчыт, Аляксандр Звяруга, Павел Ядэмскі, Кірыл Волк, Данііл Лук’ян, Сяргей Быкаў і Багдан Асяненка.
Вераніка ФІЛАНОВІЧ, газета «Пастаўскі край»
Фота аўтара.