13-15 жніўня адкрытае акцыянернае таварыства “Пастаўскі малочны завод” удзельнічала ў маштабнай выставе беларускіх вытворцаў “Made in Belarus”, якая праходзіла ў горадзе Астане Рэспублікі Казахстан.
Унікальным шансам прасоўвання сваёй прадукцыі, інфармацыйных тэхналогій, турызму, транспартных паслуг на рынку Казахстана скарысталася больш за 70 беларускіх вытворцаў. Такая магчымасць была прадастаўлена вядомым брэндам. У іх лік трапіў і “Паставы-гарадок”.
— Мы выставілі на дэгустацыю традыцыйныя сыры, якія вырабляем у вялікай колькасці, бо яны карыстаюцца шырокім попытам, — гаварыў намеснік дырэктара па камерцыйных пытаннях ААТ “Пастаўскі малочны завод” Аляксандр Іванавіч Танана. — Гэта “Галандскі прэміум”, “Расійскі”, “Груер”, “Сметанковы”. Але галоўнай “фішкай” быў наш брэнд — сыр “Вільна”.
Казахстанцы праявілі вялікую цікавасць да пастаўскіх сыроў і па заслугах ацанілі іх высокую якасць. Але самае галоўнае, безумоўна, — наладжванне дзелавых кантактаў. І гэта адбылося. Адзін буйны бізнесмен, які мае гандлёвыя кропкі і размеркавальныя склады на ўсёй тэрыторыі Казахстана, зацікавіўся прадукцыяй пастаўскіх сыраробаў яшчэ раней, па інтэрнэце, і на выставе знаёміўся з ёй ужо мэтанакіравана. У выніку выказаў жаданне супрацоўнічаць.
— Не хочацца забягаць наперад, але ёсць падставы спадзявацца на тое, што неўзабаве паміж нашым заводам і казахстанскім бізнесменам будзе заключаны кантракт на пастаўку сыру “Вільна”. Зараз вядзём наконт гэтага перамовы, — заключыў Аляксандр Танана.
ААТ “Пастаўскі малочны завод” вырабляе каля 640 тон сыроў у месяц. 65% гэтай прадукцыі ідзе на экспарт у Расійскую Федэрацыю. Астатняе рэалізуецца ў Беларусі.
Фаіна КАСАТКІНА