29 декабря 2017
Свята Божага Нараджэння, або Каляды, — трапяткое і ўзнёслае. Яго любяць і дарослыя, і дзеці. Доўжыцца яно не адзін дзень. У гэты перыяд ладзяцца шматлікія канцэрты, конкурсы, пастаноўкі.
У суботу, 30 снежня, пробашчы парафій Святога Антонія Падуанскага і Езуса Міласэрнага ў Паставах запрашаюць у раённы Дом культуры па вуліцы Станкевіча на канцэрт-спектакль “Маленькі Збаўца” з удзелам выхаванцаў нядзельнай школы. Яны падрыхтавалі розныя сцэнкі на тэму нараджэння Хрыста, падчас якіх раскажуць і пакажуць, што адбывалася ў Юдэі ў пачатку першага стагоддзя, паразважаюць над вечнай тэмай дабра і зла, будзе магчымасць разам паспяваць калядныя песні.
Пачатак у 14 гадзін. Уваход свабодны.
27 декабря 2017
14 снежня ў аддзеле ЗАГС райвыканкама адбылася ўрачыстасць, прысвечаная 100-годдзю з дня ўтварэння органаў запісу актаў грамадзянскага стану.
Свята з нагоды юбілею сабрала не толькі тых, хто працаваў і працуе ў ЗАГСе, а таксама кіраўнікоў спраў сельвыканкамаў, якія займаюцца рэгістрацыяй актаў грамадзянскага стану на тэрыторыі сельскіх Саветаў. Сярод іншых на яго былі запрошаны намеснікі старшыні райвыканкама Ю. М. Кісялёў і П. Р. Станюш, начальнік аддзела ідэалагічнай работы, культуры і па справах моладзі Г. М. Чаплінская, былы кіраўнік раёна Э. П. Казура і загадчыца натарыяльнай канторы Г. Я. Каравай.
22 декабря 2017
У сувязі са святкаваннем Божага Нараджэння па календары каталіцкай канфесіі 25 і 26 снежня і на Новы год, 1 студзеня, грамадзяне, якія пастаянна пражываюць на прыгранічнай тэрыторыі, могуць паехаць у Літву праз пункт спрошчанага пропуску “Лынтупы”. Ён у гэтыя дні будзе працаваць з 9 да 20 гадзін.
21 декабря 2017
Навагоднія і калядныя святы — час чароўных пераўвасабленняў, цудоўнага настрою, падарункаў і здзяйснення мар. Апынуцца ў казачнай атмасферы зімняга лесу дзецям і дарослым прапануе і Дзед Бай.
Убачыць адкрытае анімацыйнае прадстаўленне «Цуды ў лесе Дзеда Бая» жыхары раёна змогуць 25 снежня, 7 і 14 студзеня. У Азёрках усіх чакаюць гаспадары сядзібы — мудры казачнік Дзед Бай і яго сяброўка Марыля. Разам з Дзедам Марозам, Снягуркай, гарэзлівай свавольніцай Бабай Ягой, вясёлым селянінам Гушчыкам і яго сястрой Валяр’янай яны пераадолеюць шэраг перашкод, якія ім будзе чыніць злая вядзьмарка Цыкута. Але, як і ў любой казцы, дабро ў рэшце рэшт пераможа зло і паміж усімі персанажамі запануюць сяброўства і згода.
21 декабря 2017
Адразу некалькі інструментальных ансамбляў з нашага раёна сталі лаўрэатамі ІІ Адкрытага міжрэгіянальнага фестывалю ансамблевай музыкі “Вясёлка сугуччаў”, які прайшоў 8 снежня ў г.п. Шаркаўшчына.
Гэта музычнае свята сабрала юных выканаўцаў са школ мастацтваў не толькі Шаркаўшчынскага, але і Міёрскага, Браслаўскага, Докшыцкага, Глыбоцкага і Пастаўскага раёнаў і замежжа, якія граюць на скрыпцы, гітары, акардэоне, баяне, фартэпіяна, цымбалах, саксафоне і нават кокле. Апошні інструмент прадстаўлялі госці з суседняй Латвіі — адтуль прыехалі ажно тры дзіцячыя калектывы. А ўсяго за права называцца найлепшымі ў сваіх узроставых групах змагаліся 25 ансамбляў. І сярод іх упэўнена прагучалі “галасы” нашых удзельнікаў.
18 декабря 2017
7-8 снежня ў горадзе Кіраве Магілёўскай вобласці адбыўся 31-ы рэспубліканскі конкурс повараў, кандытараў і афіцыянтаў грамадскага харчавання спажыўкааперацыі.
Тры прадстаўніцы нашага раёна (на здымку) занялі ў ім прызавыя месцы: афіцыянт рэстарана “Світанак” Крысціна Зубрыцкая — першае, старшы повар кафэ “Церамок” Юлія Танана і кандытар кандытарскага цэха філіяла “Каапгандаль №2” Вольга Пісарчык — другое. Усе яны ўдзельнічалі ў конкурсе ўпершыню — спачатку на абласным этапе (27 кастрычніка ў Дуброўне), а здабыўшы там перамогу, — на рэспубліканскім. Вельмі хваляваліся, але змаглі праявіць сябе найлепшым чынам.
