Дэвіз сёлетняга Сусветнага дня абароны правоў спажыўцоў, які праводзіцца 15 сакавіка, — «Барацьба з забруджваннем пластыкавымі матэрыяламі».
Вырабы з пластыку настолькі трывала ўвайшлі ў наша паўсядзённае жыццё, што празмерная іх вытворчасць і выкарыстанне сталі глабальнай праблемай, і яна патрабуе скардыянаванага міжнароднага вырашэння. Тэма бягучага года будзе спрыяць павышэнню дасведчанасці і павінна падштурхнуць спажыўцоў усяго свету рабіць і пазіцыянаваць больш узважаны выбар пры набыцці тавараў, а таксама па магчымасці адмовіцца ад штодзённага выкарыстання пластыку ў любых яго формах. Таксама мяркуецца, што кампанія аб’яднае намаганні спажыўцоў, урада і прадпрыемстваў, якія выпускаюць пластыкавыя вырабы, пераадолець глабальны крызіс забруджвання навакольнага асяроддзя гэтым матэрыялам.
Задумацца ёсць над чым. Згодна са справаздачай Pew Charitable Trusts & SYSTEMIQ «Пераадольваючы пластыкавую хвалю» (надрукавана летась), калі сёння не прыняць кардынальных мер у палітыцы краін, навацыях і зменах у паводзінах спажыўцоў, то к 2040 году ў Сусветным акіяне будзе плаваць у 3 разы больш пластыку, чым зараз, а ў 2050-м яго колькасць перавысіць колькасць рыб.
Толькі ўявіце: штогод 100 тысяч марскіх млекакормячых і чарапах, а таксама мільён марскіх птушак гінуць ад забруджвання іх асяродку пражывання пластыкам. Кожны год у воды Сусветнага акіяна яго трапляе каля 8 мільёнаў тон (!). Пры гэтым палову складае посуд аднаразовага выкарыстання.
Палова ўсіх пластыкавых вырабаў, створаных за гісторыю чалавецтва, выпушчана за апошнія 15 гадоў. А 40% пластыку выкідваецца пасля аднаго выкарыстання.
Падрыхтавала Вераніка Філановіч