Ветэраны друку і паліграфіі, прафесійныя журналісты, няштатныя аўтары і чытачы сустракаюць сваё адметнае свята – 80-годдзе з дня выхаду ў свет першага нумара раённай газеты. Калектывам рэдакцыі пройдзены доўгі, яркі, запамінальны шлях, бо ў кожным нумары з года ў год, дзесяцігоддзе за дзесяцігоддзем пісалася дакументальная хроніка развіцця грамадства, народнай гаспадаркі рэгіёна, сацыяльнай сферы, адукацыі, медыцыны, культуры.
Мяняўся час і пакаленні, але раёнцы заўсёды былі ўласцівыя актуальнасць, шырокае асвятленне падзей, якія адбываліся ў раёне, краіне і за яе межамі. І ва ўсе гады ў цэнтры ўвагі журналістаў быў чалавек працы, яго паўсядзённыя справы і дасягненні.
Газета застаецца сучаснай і маладой, умацоўваецца матэрыяльна-тэхнічная база рэдакцыі, калектыў імкнецца зрабіць усё, каб расла папулярнасць выдання.
Упэўненыя, што і надалей вы будзеце стаяць на варце праўды жыцця. Жадаем шчырай удзячнасці чытачоў, новых творчых здзяйсненняў.
Сяргей Чэпік, старшыня раённага выканаўчага камітэта
Пётр Курто, старшыня раённага Савета дэпутатаў
__________________________________________________________________________________
Стваральнікі сучаснага «Пастаўскага краю»
У рэдакцыі працуюць 14 чалавек. Кіруе калектывам малады крэатыўны рэдактар Людміла Зелянкевіч. Яе намеснік — Алена Шапавалава. Яны, а таксама журналісты Фаіна Касаткіна, Анна Анішкевіч, Вераніка Філановіч, Іна Сняжкова і асвятляюць на старонках газеты жыццё раёна. Сяргей Дзеравянка працуе з пісьмамі чытачоў. Карэктар Наталія Сямёнава вычытвае тэксты і правіць памылкі. Наталля Налей напаўняе сайт газеты і садзейнічае яго папулярызацыі ў сацыяльных сетках. Аператар вёрсткі Людміла Клімюк шчыруе над дызайнам газеты і разам з Вікторыяй Дзіковіч ствараюць газетныя палосы. Прыём рэкламы — абавязак Маі Куцухі. Галоўны бухгалтар Алена Турла падлічвае выдаткі і прыбытак. У любую кропку раёна і за яго межы бяспечна дастаўляе вадзіцель Уладзімір Калібатаў.
Фота Сяргея Вшыўкава