У Беларусі 22 сакавіка пройдзе адзіны дзень адкрытых дзвярэй

У Беларусі 22 сакавіка пройдзе адзіны дзень адкрытых дзвярэй. Аб гэтым у прэс-цэнтры БЕЛТА паведаміла начальнік аддзела выхаваўчай і ідэалагічнай работы камітэта па адукацыі Мінскага гарадскога выканаўчага камітэта Ганна Рысявец.

Яна адзначыла, што адзіны дзень адкрытых дзвярэй пройдзе па ўсёй краіне ў рамках шостага школьнага дня. "Напрыклад, установы сярэдняй спецыяльнай адукацыі арганізуюць у гэты дзень работу майстар-класаў, правядуць экскурсіі, сустрэчы са школьнікамі і іх бацькамі для таго, каб азнаёміць дзяцей з найбольш запатрабаванымі сёння спецыяльнасцямі, па якіх вядзецца падрыхтоўка ў гэтых установах адукацыі", - адзначыла Ганна Рысявец.

Начальнік падкрэсліла, што на такіх сустрэчах можна не толькі прадумаць навучанне, але і сфарміраваць далейшую прафесійную перспектыву ў частцы працаўладкавання. "Цяпер такія сустрэчы праходзяць з удзелам прадстаўнікоў заказчыкаў кадраў. Акрамя таго, з улікам даручэнняў па падрыхтоўцы кадраў з улікам запытаў эканомікі краіны, у нас на перыяд канікулаў дакладна сфарміраваны графік наведвання арганізаванымі групамі будучых выпускнікоў прадпрыемстваў - заказчыкаў кадраў", - падзялілася яна.

Для мінскіх школьнікаў горад у мэтах прафарыентацыі прадугледзеў экскурсіі на буйнейшыя прамысловыя прадпрыемствы сталіцы, такія як Мінскі завод колавых цягачоў і Мінскі трактарны завод. "Яны прымаюць арганізаваныя групы ад малышоў да дарослых дзяцей. Каб гэту работу скаардынаваць, у нас загадзя фарміруюцца групы", - расказала Ганна Рысявец.

Яна дадала, што таксама на канікулах пройдзе цыкл мерапрыемстваў з праваахоўнымі і нагляднымі органамі. "Гэтыя мерапрыемствы важныя ў той перыяд, калі ў нашых навучэнцаў шмат вольнага часу, каб яшчэ раз нагадаць пра абвязкі кожнага маладога чалавека выконваць заканадаўства і пра адказныя паводзіны ў любых сітуацыях", - адзначыла яна.

БелТА