Дарожную карту па станкабудаванні Беларусь і РФ плануюць падпісаць у верасні

У рамках падпісанага пагаднення паміж урадамі Беларусі і Расійскай Федэрацыі аб супрацоўніцтве ў галіне развіцця станкаінструментальнай прамысловасці завяршаецца распрацоўка праекта праграмы мерапрыемстваў (дарожнай карты) па развіцці супрацоўніцтва паміж Міністэрствам прамысловасці Беларусі і Міністэрствам прамысловасці і гандлю РФ у галіне станкабудавання. Дарожную карту плануецца падпісаць у верасні бягучага года ў Мінску, паведамілі карэспандэнту БЕЛТА ў прэс-службе Мінпрама.

Дакумент прадугледжвае стварэнне спрыяльных умоў для ўстанаўлення і падтрымання прамых сувязей і развіцця кааперацыі па рэалізацыі сумесных праектаў паміж вытворцамі станкаінструментальнай прадукцыі дзвюх краін, стварэнне сумесных вытворчасцей станкаінструментальнай прадукцыі, а таксама фарміраванне прапаноў па распрацоўцы мер дзяржаўнай падтрымкі вытворцаў станкаінструментальнай прадукцыі Саюзнай дзяржавы. Таксама ў дарожную карту ўключана рэалізацыя праекта "Саюзны станок", накіраванага на стварэнне станка з камплектуючых, вырабленых на тэрыторыі Саюзнай дзяржавы.

Як паведамлялася, пагадненне паміж урадамі Беларусі і Расіі аб супрацоўніцтве ў галіне развіцця станкаінструментальнай прамысловасці падпісана ў Екацярынбургу ў ліпені бягучага года на палях міжнароднай прамысловай выстаўкі ІНАПРАМ. Подпісы пад дакументам паставілі намеснік прэм'ер-міністра Рэспублікі Беларусь Пётр Пархомчык і віцэ-прэм'ер - міністр прамысловасці і гандлю Расіі Дзяніс Мантураў.

Пагадненне падпісана з мэтай развіцця супрацоўніцтва ў галіне распрацоўкі, вытворчасці і выкарыстання станкаінструментальнай прадукцыі, камплектуючых вырабаў да яе ў інтарэсах суб'ектаў гаспадарання дзвюх краін. Прадугледжваецца, у прыватнасці, планаванне і ажыццяўленне сумесных праграм і праектаў у галіне станкаінструментальнай прамысловасці, а таксама ўзаемны абмен навуковай, тэхнічнай інфармацыяй паміж суб'ектамі гаспадарання дзвюх дзяржаў у розных галінах станкаінструментальнай прамысловасці. Акрамя таго, прадугледжваецца супрацоўніцтва ў фармаце кірмашоў і выставак прамысловай прадукцыі, арганізацыі бізнес-форумаў з удзелам прадстаўнікоў гандлёва-прамысловых і бізнес-колаў Беларусі і Расіі.

Рэалізацыя міжурадавага пагаднення ў галіне развіцця станкаінструментальнай прамысловасці адкрывае новыя магчымасці росту эканомік Беларусі і Расіі.

БелТА