Віцебскі камбінат шаўковых тканін прадае вытворчы корпус амаль за Br2,8 млн

ААТ "Віцебскі камбінат шаўковых тканін" выставіла на аўкцыён асноўны вытворчы корпус з пачатковай цаной продажу амаль Br2,8 млн, паведамілі карэспандэнту БЕЛТА ў Віцебскім філіяле РУП "Інстытут нерухомай маёмасці і ацэнкі", які выступае арганізатарам таргоў.

Прадпрыемства ў ліпені 2021 года выйшла з працэдуры санацыі і знаходзіцца ў ліквідацыі па рашэнні эканамічнага суда Віцебскай вобласці. Абавязкі ліквідатара ўскладзены на антыкрызіснага кіраўніка Таццяну Ісакаву. Ёй трэба будзе забяспечыць разлік па даўгах за кошт рэалізацыі абсталявання і аб'ектаў нерухомай маёмасці з інжынернымі сеткамі. Назначаны на 31 жніўня аўкцыён будзе першым мерапрыемствам па распродажы нерухомай маёмасці банкрута ў ходзе ліквідацыі.

На таргі па рашэнні крэдытораў выстаўлены адзіным лотам чатырохпавярховы вытворчы корпус з цокальным паверхам і інжынернымі камунікацыямі агульнай плошчай звыш 14,1 тыс.кв.м. Будынак падзелены на 7 ізаляваных памяшканняў рознага функцыянальнага прызначэння памерам ад 92,6 кв.м да амаль 3 тыс. кв.м. Для абслугоўвання капітальных пабудоў выдзелены зямельны ўчастак, які будзе прадастаўлены ў агульную долевую арэнду.

У склад лота ўключана каля 20 адзінак абсталявання, у тым ліку грузавы ліфт і сістэма відэанагляду. У якасці элементаў добраўпарадкавання патэнцыяльнаму пакупніку дастанецца таксама Дошка гонару з керамзітнай пліты, ацэненая ў памеры Br700, і азеляненне, у тым ліку "вінаград дзявочы". Акрамя таго, пераможца абавязуецца пакрыць кошт паслуг па ацэнцы аб'екта ў суме больш за Br5,7 тыс.

Віцебскі камбінат шаўковых тканін створаны ў сярэдзіне 50-х гадоў мінулага стагоддзя. У 2000 годзе на базе маёмаснага комплексу камбіната створана ААТ з аднайменнай назвай. Прадпрыемства спецыялізавалася на выпуску тканін рознага асартыменту, у тым ліку падкладачных, плашчавых (для спецыяльнага і форменнага адзення), тэхнічных тканін, а таксама тканін спецыяльнага прызначэння з экраніруючымі ўласцівасцямі.

Вядзенне па справе аб банкруцтве ААТ "ВКШТ" пачата эканамічным судом у лютым 2015 года па ініцыятыве самога даўжніка. У снежні 2015 года была адкрыта працэдура санацыі на 18 месяцаў, якая ў далейшым прадоўжана на 5 гадоў - да 23 чэрвеня 2022 года. У ліпені 2021-га з улікам пададзеных у суд хадайніцтва сходу крэдытораў акцыянернага таварыства, а таксама пазіцыі канцэрна "Беллегпрам", які ажыццяўляе ўладальніцкі нагляд у ААТ, вырашана адкрыць адносна даўжнiка ліквідацыйнае вядзенне па справе, якое павінна быць праведзена за 9 месяцаў.

БелТА