У журы рэгіянальных адбораў на «Славянскі базар у Віцебску» могуць увайсці лаўрэаты мінулых гадоў

У журы рэгіянальных адбораў на конкурсы "Славянскага базару" могуць увайсці лаўрэаты мінулых гадоў. Аб гэтым карэспандэнту БЕЛТА паведамілі ў Цэнтры культуры "Віцебск".

Арганізатары міжнароднага фестывалю плануюць крыху змяніць фармат правядзення рэгіянальнага адбору для паўночнага рэгіёна. З адпаведнай ініцыятывай яны ўжо выступілі перад Міністэрствам культуры. "Мы прапанавалі ўключыць у склад журы зорак эстрады і лаўрэатаў мінулых гадоў, цяпер дзеючых заслужаных або толькі пачынаючых артыстаў, якія ў свой час пражылі гэту гісторыю. Гэта людзі, якія маюць вопыт канцэртных выступленняў, ужо атрымалі перамогу на "Славянскім базары ў Віцебску", прадстаўляючы нашу краіну. Яны змаглі б падзяліцца сваімі ўражаннямі ад конкурсаў, карыснымі для навічкоў вакальнымі сакрэтамі і псіхалагічнымі момантамі. Адначасова лаўрэаты маглі б правесці майстар-класы", - расказалі ў дырэкцыі фестывалю.

Усіх вакалістаў, якія прыедуць у Віцебск на рэгіянальны адбор, арганізатары плануюць запрасіць на экскурсію ў музей фестывалю і на яго галоўную пляцоўку - Летні амфітэатр. Для ўдзельнікаў адбораў мінулых гадоў ва ўсіх абласцях краіны дырэкцыя друкавала спецыяльныя дыпломы. На гэты раз вакалістаў чакае сувенірная акрэдытацыя, падобная да той, якую атрымліваюць на самім летнім творчым форуме.

Рэгіянальныя адборы на дзіцячы і дарослы вакальныя конкурсы "Славянскага базару" пройдуць з 1 лістапада па 15 снежня. У паўночным рэгіёне праслухоўванне назначана на 9 снежня ў Цэнтры культуры "Віцебск".

БелТА