Стала вядома колькасць спартсменаў, якія выйдуць на арэны ІІ Гульняў краін СНД у Віцебску і Оршы

Больш за 210 спартсменаў выйдуць на арэны ІІ Гульняў краін СНД у Віцебску і Оршы. Аб гэтым карэспандэнту БЕЛТА паведаміў намеснік начальніка ўпраўлення спорту і турызму Віцебскага аблвыканкама Дзяніс Шкір'янаў.

Ужо афіцыйна названы лічбы - колькасць прадстаўнікоў дэлегацый краін, якія прымуць удзел у спаборніцтвах на Гульнях у Віцебскай вобласці. "Калі мы гаворым пра бокс (баксёры будуць спаборнічаць на Лядовай арэне ў Оршы. - Заўвага БЕЛТА), то пакуль мы чакаем 186 чалавек: спартсмены, трэнерскі штаб, прадстаўнікі, суддзі, урачы. Па імянных заяўках тут праходзяць 133 спартсмены і прадстаўлена восем каманд: Беларусь, Азербайджан, Арменія, Кыргызстан, Расія, Таджыкістан, Туркменістан і Узбекістан. Па тайландскім боксе агульная колькасць удзельнікаў дэлегацый складае 113 чалавек, афіцыйная лічба спартсменаў - 76. Геаграфія тут крыху вузей: Беларусь, Азербайджан, Казахстан, Кыргызстан, Расія, Туркменістан і Узбекістан", - растлумачыў ён.

Такім чынам, на спартыўную арэну выйдуць 133 чалавекі ў Оршы і 76 - у Віцебску. Аднак арганізатары адзначаюць, што гэта колькасць яшчэ можа змяніцца ў большы бок - ёсць верагоднасць дабаўлення якой-небудзь краіны.

Віцебскую вобласць на гэтых стартах рыхтуюцца прадставіць некалькі спартсменаў. "Гэтымі днямі мы пачалі прапрацоўваць такую інфармацыю. Па тайландскім боксе з нашай вобласці праходзіць адзін чалавек, па боксе - два чалавекі і адзін разглядаецца. Ва ўсіх цяпер актыўна пачынаюцца трэніровачныя зборы. Тут таксама могуць быць карэкціроўкі", - дадаў Дзяніс Шкір'янаў.

Два гарады ў паўночным рэгіёне прымуць ІІ Гульні краін СНД - Віцебск і Орша. Абласны цэнтр чакае юных майстроў муай-тай, райцэнтр - баксёраў. Маштабныя старты ў Беларусі намечаны на 4-14 жніўня.

БелТА