Міжнародны фестываль сучаснай харэаграфіі ў Віцебску зноў перанесены

Міжнародны фестываль сучаснай харэаграфіі (IFMC) у Віцебску перанесены на 2022 год з-за пандэміі, паведамілі БЕЛТА ў дырэкцыі форуму.

Арганізатары рыхтаваліся да 33-га фестывалю, была практычна сфарміравана праграма і прадугледжана фінансаванне. "Мы чакалі і з хваляваннем вывучалі кожную заяўку на рэспубліканскі конкурс сучаснай харэаграфіі. Але з улікам эпідэмічных абставін мы аб'яўляем аб пераносе IFMC на 2022 год. Дзякуем беларускім харэографам і танцоўшчыкам за жаданне прыняць удзел у конкурсе, танцавальным кампаніям, пастаноўшчыкам і педагогам з розных краін за жаданне прыехаць у Віцебск. Беражыце сябе, захавайце свае творы і стварайце новыя, мы абавязкова сустрэнемся з вамі і нашым гледачом", - адзначылі ў дырэкцыі IFMC.

Міжнародны фестываль сучаснай харэаграфіі ў Віцебску да 2020 года праводзіўся штогод з 1987 года ў лістападзе. Фестываль стаў першым і да 1997 года заставаўся адзіным форумам сучаснага танца на тэрыторыі былога СССР. Праграма IFMC уключала мноства падзей і мерапрыемстваў. Асноўнай падзеяй фестывалю быў міжнародны конкурс, які праводзіцца раз у два гады, чаргуючыся з беларускім конкурсам сучаснай харэаграфіі.

БелТА