Лялечны тэатр у Віцебску паставіць спектакль без слоў «Дзюймовачка»

Беларускі тэатр "Лялька" ў Віцебску паставіць спектакль "Дзюймовачка" па аднайменнай казцы дацкага пісьменніка Ханса Крысціяна Андэрсена. Пастаноўка будзе ісці без слоў, паведаміў карэспандэнту БЕЛТА рэжысёр і акцёр тэатра Міхаіл Клімчук.

Спектакль паўторыць вядомую шырокай аўдыторыі казачную гісторыю, апісаную Андэрсенам. Некаторыя эпізоды са знаёмага сюжэта будуць выразаны. Скарацілі тэкст спецыяльна для зусім юнага гледача, каб укласціся прыкладна ў 45 мінут. Для маладога рэжысёра гэта пастаноўка стане эксперыментам на сцэне тэатра лялек. "Думаю, гэта будзе выклік самому сабе і акцёрам, таму што мы павінны паказаць, што на 100 працэнтаў лялечнікі. Ніякага тэксту, а толькі візуальны рад. З дапамогай лялек і лялечных прыёмаў мы зробім так, што будзе нават маленькаму гледачу зразумела, што адбываецца, што адчувае персанаж і што з ім наогул здараецца", - сказаў Міхаіл Клімчук.

Паводле яго слоў, выбар формы падачы матэрыялу дыктуе сам твор - у казцы ў асноўным ідзе апавяданне, а дыялогі агульныя толькі з мышшу, кратом і жуком. Рэжысёр прызнаўся, што ў кожнай пастаноўцы імкнецца да таго, каб у ёй "было шмат лялечнага" і менш у матэрыяле саміх людзей.

Акцёры пакуль праводзяць рэпетыцыі, мастакі і музыканты заняты сваёй часткай работы. Поўная здача матэрыяльнай часткі - лялькі і дэкарацыі - запланавана на канец красавіка. "Кампазітар ужо распісаў музыку на 60-70 працэнтаў спектакля. Акцёры прыходзяць у цэх, бяруць лялькі, якія больш-менш гатовы, няхай яны не размаляваны, у іх пакуль няма твару і валасоў, але ёсць цела, рукі, ногі, галава. Дапусцім, жаба ў працэсе стварэння: лапы яшчэ ляжаць асобна, - адзначыў рэжысёр. - Дэкарацыі - наогул вельмі складаная частка. Паводле задумы гэта стары паддашак, на якім шмат антыкварных рэчаў і мэблі. Таму мастачка Соня Шахноўская з Мурманска сапраўды намалявала антыкварыят. Цяпер нашаму сталяру даводзіцца рабіць разныя ножкі, шуфлядкі і іншыя дэталі. Усё вельмі прыгожа і нялёгка".

Паколькі ў пастаноўцы працуюць два студэнты, якія першы месяц лета едуць на сесію ў Мінск і Санкт-Пецярбург, здаць спектакль плануюць бліжэй да лета. Рэжысёр і акцёры разлічваюць, што гэта адбудзецца да 1 чэрвеня.

БелТА