Каля 140 танцораў, 25 калектываў. У Віцебску расказалі, якія спектаклі на IFMC варта паглядзець

Галоўнай падзеяй XXXIV Міжнароднага фестывалю сучаснай харэаграфіі (IFMC) стане рэспубліканскі конкурс, дзе танцоры і харэографы Беларусі прадставяць свае лепшыя пастаноўкі. Нязменны дырэктар фестывалю Марына Раманоўская расказала на прэс-канферэнцыі ў Віцебску, што чакае гледачоў IFMC, перадае карэспандэнт БЕЛТА.

Адкрыццё фестывалю пройдзе 22 лістапада, і маштабны танцавальны форум прадоўжыцца да 26 лістапада. Усяго на IFMC, уключаючы беларусаў, прыедуць прадстаўнікі 10 краін блізкага і далёкага замежжа - Расіі, Македоніі, Італіі, Харватыі і іншых. "Разам з віцебскімі ўдзельнікамі ў конкурснай праграме фестывалю будуць удзельнічаць каля 140 чалавек, 25 калектываў. Агульны час паказу на закрытым туры складзе амаль пяць гадзін. Конкурс будзе складацца з 9 блокаў, закрыты тур будзе праходзіць у Нацыянальным акадэмічным драмтэатры імя Якуба Коласа і ў канцэртнай зале "Віцебск". Фінал адбудзецца на сцэне канцэртнай залы", - расказала журналістам дырэктар фестывалю.

Яна дадала, што па рэгламенце калектывы і выканаўцы могуць прадставіць свае нумары да 20 мінут, напрыклад, мініяцюры або харэаграфічныя спектаклі, аднак такіх у праграме фестывалю будзе няшмат. "У выніку мы адабралі 25 калектываў. Мы дасведчаныя, шмат што бачылі, і здзівіць нас не так лёгка. Большая частка работ - гэта такая моцная добрая сярэдзіна, дзе відаць, што людзі доўгія гады займаюцца харэаграфіяй, іх цела культурна, развіта, яны думаюць, здольны адгукацца на задумы харэографа. І пры гэтым было некалькі работ, якія нас уразілі, здзівілі. Напрыклад, адна з работ будзе прадстаўлена ў стылі тэатра асбурду", - прыадкрыла таямніцу кіраўнік фестывалю, адзначыўшы, што фінал конкурсу абяцае быць вельмі відовішчным і захапляючым.

Марына Раманоўская падкрэсліла, што за больш як 30 гадоў тэма конкурсу стала настолькі блізкая аматарам сучаснай харэаграфіі, што маладыя танцоры і харэографы імкнуцца прыехаць на IFMC, паўдзельнічаць у ім і незалежна ад таго, якое месца яны зоймуць, атрымаць вялікі вопыт, пэўную загартоўку. "Для іх важна тут быць, адбыцца як артысту і танцоўшчыку, быць ацэненымі, пачуць меркаванне калег і паглядзець на іншых. Гэта пляцоўка бясцэнная для такога вопыту", - сказала дырэктар фестывалю.

Госці IFMC не застануцца расчараванымі выступленнямі Беларускага дзяржаўнага маладзёжнага тэатра, тэатра "Балет Яўгена Панфілава" з Пермі, тэатра "Балет "Масква" і кампаніі "Канон Данс" з Санкт-Пецярбурга. Гаворачы аб удзельніках з расійскай сталіцы, Марына Раманоўская адзначыла, што ў калектыву цікавая пастаноўка. "Для нас гэта таксама інтрыга, таму што мы глядзелі толькі фрагменты іх выступлення, а прэм'ера гэтага дзейства адбудзецца ў Маскве 17 лістапада, і мы таксама, можна сказаць, атрымліваем прэм'еру. Гэта заўсёды цікава - убачыць тое, што яшчэ амаль ніхто не бачыў. Яшчэ ўпершыню афішу нашага фестывалю ўпрыгожвае дзяржаўны маладзёжны тэатр. А яшчэ цікава, што іх спектакль "Судакрананне" паставіла наш віцебскі харэограф. Яго прэм'ера прайшла ў мінулым годзе ў Мінску. Гэта вельмі цёплае дзейства, тэма яго вельмі актуальная, патрэбная, добрая, гуманная - як людзі патрэбны адзін аднаму. Ён добры, мяккі яшчэ і візуальна, напэўна, таму што касцюмы ў артыстаў звязаны, і яны мяккія і добрыя. Гэта спараджае нейкую асаблівую дзіцячасць, цеплыню. Усім рэкамендую яго паглядзець, і нават дзецям з бацькамі", - падзялілася дырэктар фестывалю.

Генеральны дырэктар Цэнтра культуры "Віцебск" Глеб Лапіцкі, які таксама ўдзельнічаў у прэс-канферэнцыі, расказаў, што білеты на асноўныя мерапрыемствы IFMC яшчэ даступны, але самыя "смачныя" месцы аматары сучаснай харэаграфіі разабралі. Ён таксама дадаў, што добрае супрацоўніцтва дырэкцыі з Рэспубліканскім палацам культуры прафсаюзаў у бягучым годзе прадоўжыцца, і ў Мінску таксама пройдуць паказы харэаграфічных спектакляў.

БелТА