Галоўную сцэну "Славянскага базару ў Віцебску" ўпершыню могуць упрыгожыць дзеці

Галоўную сцэну Міжнароднага фестывалю мастацтваў "Славянскі базар у Віцебску" ўпершыню могуць упрыгожыць дзеці. Аб гэтым карэспандэнту БЕЛТА паведамілі ў Цэнтры культуры "Віцебск".

Дырэкцыя форуму запрашае юных талентаў дадаць яркасці "Славянскаму базару" і разам упрыгожыць пляцоўку Летняга амфітэатра. Работы могуць стаць элементам сцэнаграфіі на канцэрце "Госці з будучыні" - маштабным дзіцячым праекце з удзелам блогераў, цік-токераў і лепшых творчых калектываў. Такое шоу на фестывалі пройдзе ўпершыню.

Арганізатары васільковага фестывалю аб'явілі конкурс дзіцячых малюнкаў "Віцебск. Лета. Фестываль", да ўдзелу ў якім дапускаюцца мастакі з любой краіны ва ўзросце да 14 гадоў. Прэтэндэнтам на перамогу трэба намаляваць што-небудзь на адпаведную тэму і адправіць работу на электронны адрас: festvitebsk.pr@gmail.com або па пошце: 210026, г. Віцебск, вул. Маякоўскага, 1 з паметкай "на конкурс "Віцебск. Лета. Фестываль". Жадаючыя могуць на названы адрас асабіста прынесці свае малюнкі.

Пераможцаў плануюць аб'явіць 7 чэрвеня, за 33 дні да афіцыйнага старту "Славянскага базару". Падарункі ад дырэкцыі фестывалю і спецыяльнае запрашэнне на канцэрт на дзве персоны належаць дзесяці найлепшым мастакам.

"Конкурс задуманы для таго, каб да падрыхтоўкі да маштабнага праекта, ды і ў цэлым да "Славянскага базару", непасрэднае дачыненне мела як мага больш юных і таленавітых хлопцаў і дзяўчат. Ён дасць магчымасць трансліраваць творчасць многіх гледачоў, якія знаходзяцца ў зале, і на сцэне", - адзначылі ў Цэнтры культуры. - Дзякуючы праекту мы наблізім дзіцячую аўдыторыю да фестывалю".

ХХХIII Міжнародны фестываль мастацтваў "Славянскі базар у Віцебску - 2024" пройдзе з 9 па 15 ліпеня.

БелТА