Сардэчна віншую вас з вялікім міравыратавальным святам Раства Хрыстова і надыходзячым Навагоддзем! Радасць напаўняе нашыя сэрцы, бо нарадзіўся Збавіцель свету, Гасподзь наш Ісус Хрыстос, які адкрыў новую эпоху жыцця роду чалавечага. Ён нарадзіўся і ўвасобіўся ў чалавечую плоць, явіў пакору і любоў і сваім прыкладам жыцця на зямлі даў магчымасць, каб мы змянілі сваё жыццё і сталі на шлях Хрыста, на шлях маральнага закону, які для ўсіх людзей адзін і на ўсе часы. Ідучы па гэтым шляху, будзем мець «жыхарства на нябёсах» (Філ. 3,20). Праз пакаянне і змену нашай душы будзем імкнуцца да подзвігу любовi, усёдаравання, лагоднасці, пакоры, цноты, устрымання і іншым хрысціянскім цнотам. Хрыстос нараджаецца, каб праз выратавальную Крыжовую Ахвяру адкрыць браму вечнага жыцця для ўсяго чалавецтва.
Малітоўна жадаю вам каляднай радасці, здароўя душэўнага і цялеснага, дабрабыту, міру, цішыні і згоды ў новым годзе!
З Раством Хрыстовым!
Благачынны, настаяцель храма Свяціцеля Мікалая Цудатворца г. Паставы протаіерэй Валерый Пашкевіч
* * *
7 студзеня у Доме культуры па вул. Станкевіча адбудзецца калядны ранішнік навучэнцаў нядзельнай школы пры храме Свяціцеля Мікалая Цудатворца. Пачатак у 14.00.
Паважаныя вернікі і святары праваслаўнай царквы!
Ад усёй душы віншуем вас з Раством Хрыстовым! Гэта адно з самых вялікіх і светлых свят. Для мільёнаў людзей яно служыць сімвалам чысціні, шчырасці, чалавечнасці і міласэрнасці. Дадзеныя каштоўнасці адзіныя для ўсіх нас, з'яўляючыся шматвяковай асновай добрасуседства, сяброўства і паразумення. Каляды вучыць нас ставіцца беражлівей адзiн да аднаго, шанаваць жыццё ва ўсіх яго праявах, абуджаючы ў нас лепшыя чалавечыя пачуцці. Калядныя святы азначаюць самыя добрыя справы, высокія намеры і надзеі.
У гэты светлы дзень ад усёй душы жадаем вам шчасця, моцнага здароўя, дабрабыту і поспехаў ва ўсіх пачынаннях! Няхай у вашых сем'ях заўсёды пануюць радасць і згода! Шчаслівых Каляд!
Сяргей Чэпік, старшыня раённага выканаўчага камітэта
Пётр Курто, старшыня раённага Савета дэпутатаў