Сёння Сафія Сеніна і Міхаіл Коцек атрымалі першы ў сваім жыцці дакумент - пасведчанне аб нараджэнні. Урачыстая рэгістрацыя нованароджаных прайшла ў аддзеле ЗАГС Пастаўскага райвыканкама.
— Дарагія Андрэй і Вікторыя Сеніны, Дзмітрый і Анастасія Коцек, — звярнулася да бацькоў малых начальнік аддзела ЗАГС Аніта Несцяровіч. — На вашым бацькоўскім шляху будуць і радасці, і засмучэнні, і бяссонныя ночы, і сонечныя дні шчасця, калі ваша дзіця вымавіць першыя словы, зробіць першыя крокі, пойдзе ў першы клас, уступіць у самастойнае жыццё… І заўсёды вы, самыя дарагія людзі, будзеце яму надзейнай абаронай і апорай. Прывівайце свайму дзіцяці ўсё самае лепшае, цудоўнае, высакароднае, гадуйце яго дастойным чалавекам і грамадзянінам нашай Беларусі!
Чэргу віншаванняў падхапілі старшыня раённай арганізацыі грамадскага аб'яднання "Беларускі саюз жанчын" Наталля Седзюкевіч, калегі і кіраўніцтва Сеніных і Коцек з РАУС, ЦРБ, ІМПЗ па Пастаўскім раёне, іх дзеці і бацькі.
Па матэрыялах газеты "Пастаўскі край"