Удалая работа

14 снежня на базе СШ №4 адбылося падвядзенне вынікаў раённага тура рэспубліканскага маладзёжнага праекта «100 ідэй для Беларусі». Куратарамі мерапрыемства выступілі райкам БРСМ і аддзел па адукацыі райвыканкама.

Вось ужо 12-ы раз рэспубліканскі праект ставіць для сябе галоўнай мэтай пошук у розных сферах лепшых ідэй, якія маглі б быць карысныя грамадству. Асноўныя задачы - развіваць маладзёжныя вынаходніцтвы і ўкараняць у эканоміку краіны лепшыя інавацыйныя праекты і навукова-тэхнічныя распрацоўкі.

Сёлета на суд экспертнага савета ў нашым раёне былі вынесены работы ў дзвюх намінацыях — «Ахова здароўя» і «Таварыства, эканоміка і сацыяльная сфера». У апошняй і вызначыўся пераможца. Ім стаў навучэнец СШ №4 Раман Сарокін.

Праз мультымедыйную прэзентацыю ён прадставіў сваю даследчую работу «Дачнае пытанне, ці Другое жыццё беларускай вёскі». Юнак расказаў, што бачыць дачны рух адным з альтэрнатыўных спосабаў адраджэння беларускай вёскі. Ідэя для праекту нарадзілася ў Рамана падчас знаходжання на канікулах у вёсцы ў бабулі. Юнаму даследчыку і яго куратару - настаўніку геаграфіі А. В. Пашкевіч - за 2 гады ўдалося знайсці для работы шмат матэрыялу. Найважнейшай стала інфармацыя аб тым, у якіх вёсках ёсць дамы (а таксама іх колькасць і кошт), якія могуць стаць дачамі для людзей не толькі з вялікіх гарадоў Беларусі, але і бліжэйшых краін. У перспектыве юнак плануе стварыць інтэрактыўны картоід, які дапаможа патэнцыйным пакупнікам вызначыцца з выбарам населенага пункта для пакупкі дачы, і размясціць яго на сайце райвыканкама. А гэта можа паслужыць і развіццю аграэкатурызму ў нашым раёне.

Застаецца пажадаць поспехаў Раману і ў абласным туры! Мы ў цябе верым!

Крысціна Рубель, раённая газета «Пастаўскі край»