16 верасня Паставы з афіцыйным візітам наведалі госці са Смаленскай вобласці Расіі: намеснік кіраўніка муніцыпальнага ўтварэння Руднянскага раёна па сацыяльных пытаннях Валянціна Раманенка і начальнік аддзела культуры Валянціна Вінаградава. Асноўная мэта рабочай паездкі - устанаўленне пабрацімскіх сувязей з нашым раёнам.
Адпраўным пунктам для наладжвання больш цеснага супрацоўніцтва паслужыла ўзаемнае жаданне захаваць гістарычную памяць аб Вялікай Айчыннай вайне. Нягледзячы на тое, што яе апошнія стрэлы адгрымелі 77 гадоў таму, людзі дагэтуль не перастаюць шукаць сваіх знікшых без вестак сваякоў. І ёсць энтузіясты, гатовыя ім у гэтым бескарысліва дапамагаць. Адзін з іх - настаўнік гісторыі, кіраўнік па ваенна-патрыятычным выхаванні Пастаўскай гімназіі, актыўны ўдзельнік Наваполацкага пошукавага атрада «Разведчыкі воінскай славы» Аляксандр Кузняцоў. Дзякуючы яго намаганням з небыцця вернуты сотні імёнаў абаронцаў Айчыны. Дыяпазон пошуку не абмяжоўваецца толькі нашым рэгіёнам: калі ёсць запыт з боку сваякоў, ён вядзецца ў архівах усіх постсавецкіх рэспублік, Германіі, Венгрыі, Чэхаславакіі, Польшчы і нават Кітая. А нядаўна Аляксандр Іванавіч устанавіў баявы шлях камандзіра партызанскага атрада «Знішчальнік» Апанаса Васільевіча Жукава, пахаванага ў брацкай магіле савецкіх воінаў і партызан у Мядзелі. Звесткі былі перададзены ў Руднянскі раён.
— Афанасій Жукаў лічыцца знікшым без вестак у 1941 годзе. Гэтыя дадзеныя змяшчаюцца ў «Кнізе Памяці. Смаленская вобласць. Руднянскі раён» і архіўных дакументах Цэнтральнага архіва Міністэрства абароны Расіі. Але ў той жа час у Нацыянальным архіве Беларусі захоўваюцца дакументы, якія пацвярджаюць баявы шлях байца Чырвонай Арміі з такім прозвішчам да студзеня 1944-га. Як аказалася, гэта аднафамільцы. Адзін родам са Смаленскай вобласці, другі — з Калужскай, — расказваў Аляксандр Кузняцоў. — Цяпер пашукавікі Смаленскай вобласці спрабуюць устанавіць сувязь са сваякамі Апанаса Васільевіча Жукава з Калужскай вобласці.
Нягледзячы на прыкрую блытаніну, супрацоўніцтва завязалася. Тым больш што і ў Расіі тэме ўвекавечання памяці савецкіх салдат надаецца вялікая ўвага: праводзіцца акцыя «Вахта памяці» (толькі сёлета ў Руднянскі раён на перапахаванне сваіх сваякоў прыехала 12 сем'яў з розных рэгіёнаў), адкрываюцца мемарыялы, вядуцца пошукавыя работы, у якіх актыўна ўдзельнічае моладзь.
— Дзякуй, што робіце такую патрэбную работу, — гаварылі на сустрэчы ў райвыканкаме Валянціна Раманенка і Валянціна Вінаградава. — Нам вельмі прыемна, што пра нашых землякоў памятаюць, ведаюць пра іх подзвіг. Разлічваем, што наша супрацоўніцтва будзе толькі мацнець.
Няма ў гэтым сумневу і ў пастаўчан. Устанавіць больш цесныя сувязі са сваімі аднадумцамі са Смаленшчыны Аляксандр Кузняцоў плануе на навукова-практычнай канферэнцыі «Лёс салдата». Яна пройдзе ў Маскве ў канцы лістапада. Будзе мацнець культурнае і эканамічнае супрацоўніцтва паміж нашым і Руднянскім раёнам. Зараз распрацоўваецца праект дамовы, сама яна будзе падпісана ў бліжэйшы час.
З 22 чэрвеня 1941 года па 1 верасня 1945-га на франтах Вялікай Айчыннай вайны без вестак прапала 4,5 млн чалавек.
Пасля сустрэчы ў райвыканкаме Валянціна Аляксандраўна і Валянціна Дзмітрыеўна бліжэй пазнаёміліся з нашым горадам, прынялі ўдзел у святочным канцэрце, прысвечаным Дню народнага адзінства. На ўрачыстасці яны зачыталі прывітальны адрас і падарылі кіраўніку раёна Сяргею Чэпіку ікону Казанскай Божай Маці, пажадаўшы, каб яна дабраслаўляла жыхароў Пастаўшчыны на добрыя справы.
Вераніка Філановіч, раённая газета «Пастаўскі край»