Распалілі вогнішча дружбы

Моладзь Віцебшчыны і Пскоўшчыны сустрэлася ў Верхнядзвінскім раёне, каб паспаборнічаць, пагутарыць, а галоўнае — разам ушанаваць памяць герояў Вялікай Айчыннай вайны.

Лагер быў арганізаваны 1—2 ліпеня, называўся «Курган-2022» і быў прысвечаны Году гістарычнай памяці. Ён размясціўся на Кургане Дружбы, які знаходзіцца за 32 км ад Себежа на мяжы Беларусі, Расіі і Латвіі. Месца выбрана не выпадкова: разам у гэтых краях беларусы, рускія і латышы фармавалі партызанскія атрады. І менавіта тут з 3 ліпеня 1959-га сустракаліся партызаны, якія ваявалі ў гэтых краях у гады Вялікай Айчыннай вайны.

Шмат людзей аддалі свае жыцці за тое, каб праз гады на гэтым месцы пад мірным небам весела шумела моладзь. У іх ліку была і пастаўская - на «Курган-2022» адправіліся 12 нашых землякоў. Удзельнікамі маштабнага мерапрыемства сталі першы сакратар райкама БРСМ Кацярына Малевіч, настаўнік СШ №4 Лізавета Паташова, дырэктар Пастаўскага раённага краязнаўчага музея Валянціна Друсь, вайсковец 1-га радыётэхнічнага цэнтра Уладзіслаў Урублеўскі, вайскоўцы в/ч 2044 Смаргонскай пагранічнай групы, прадстаўнікі пастаўскага каледжа, лясгаса і інш.

Праца лагера пачалася з адкрытага дыялогу, падчас якога прадстаўнікі Віцебскай і Пскоўскай абласцей абмеркавалі пытанні патрыятычнага выхавання моладзі. Далей удзельнікаў чакала праца ў розных адукацыйных, спартыўных і патрыятычных кластарах. Быў праведзены ўрок памяці і рэалізаваны патрыятычны праект «Ліст Герою Вялікай Перамогі», адбылася ваенна-спартыўная гульня «Паўночны рэгіён», інтэлектуальны оpen air «Кветкі Вялікай Перамогі» і іншыя мерапрыемствы. Завяршыў дзень конкурс патрыятычных песень і вершаў «Беларусь памятае!». У ім сябе праявіў прадстаўнік пастаўскай каманды - намеснік начальніка АПК «Мальдзевічы» Сяргей Сагаманян. Ён выступаў з вершам «Ганарыцца я не перастану», які напісаў сам.

Не менш насычаным аказаўся 2-гі дзень лагера. Ён запомніўся ўдзельнікам «Народнай зарадкай», прэзентацыяй палатачнага лагера, выставай насценгазет, чэмпіянатам па зборцы спілс-карты «Ведаю Беларусь», мітынгамі-рэквіемамі на беларускім і расійскім баках. А яшчэ — вогнішчам сяброўства, у якога ўсе хорам выконвалі такія несмяротныя хіты ваенных гадоў, як «Кацюша», «Смуглянка», «На безназоўнай вышыні». Зносіны працягнуліся ў адкрытым дыялогу, у якім прыняло ўдзел кіраўніцтва Віцебскай і Пскоўскай абласцей, а таксама прадстаўнікі маладзёжнага парламента дзвюх дзяржаў.

3 ліпеня на Кургане Дружбы адбылося ўрачыстае мерапрыемства, прысвечанае Дню Незалежнасці Рэспублікі Беларусь. Цяпер на гэтым сімвалічным месцы на цэлы год запанавала цішыня. А можа, гэта зацягнулася хвіліна маўчання?

Іна Сняжкова, раённая газета «Пастаскі край»

Фота прадаставіла Кацярына Малевіч