11-класнікі школ раёна і гімназіі здалi цэнтралізаваны экзамен

Мінулая нядзеля была па-сапраўднаму гарачай для выпускнікоў 11-х класаў школ раёна і Пастаўскай гімназіі. Разам з іншымі 11-класнікамі з усёй Беларусі яны здавалі першы ў гісторыі цэнтралізаваны іспыт па рускай ці беларускай мове на выбар.

Іспыт пачынаўся ў 11.00. А ўжо ў 9.30 да будынка Пастаўскага дзяржаўнага каледжа, які выбраны пунктам правядзення ЦЭ ў нашым раёне, пачалі пад'язджаць аўтобусы са школьнікамі.

Усяго на цэнтралізаваны іспыт прыбылі 157 чалавек. Рускую мову выбралі для здачы 123 выпускніка, беларускую — 35.

Сам іспыт праходзіў аналагічна цэнтралізаванаму тэсціраванню. У аўдыторыях школьнікам раздалі бланкі з заданнямі, на выкананне якіх адводзілася роўна 2 гадзіны.