Тэматычны торт і Ганаровая грамата: Субоцін павіншаваў віцебскіх хакеістаў з перамогай у Кубку Салея
Спартсменаў ХК "Віцебск", якія другі раз запар заваявалі прэстыжны Кубак Салея, абыграўшы ў Салігорску "Шахцёра", ушаноўвалі прадстаўнікі абласной і гарадской улады, перадае карэспандэнт БЕЛТА.
Перамогу землякоў у другім па значнасці клубным турніры ў беларускім хакеі віцябчане ўспрынялі з небывалай радасцю. Двойчы ўладальнікі прэстыжнай узнагароды вярнуліся на малую радзіму героямі, і прадстаўнікі абласной і гарадской улады як адданыя паклоннікі спорту прыбылі да хакеістаў не з пустымі рукамі. Старшыня аблвыканкама Аляксандр Субоцін перадаў кіраўніку клуба Руслану Салодкіну Ганаровую грамату аблвыканкама і торт у бела-сініх танах, увянчаны мініяцюрным Кубкам Салея.
"Вялікі дзякуй вам за перамогу. Калі перамагаеце вы, перамагае кожны жыхар вобласці, а гэта амаль 1,1 млн чалавек. Усе балелі за вас, нават тыя, хто далёкі ад хакея. Калі вы перамаглі, радаваліся амаль у кожным доме і кватэры нашай вобласці. Вы ўжо двухразовыя ўладальнікі Кубка, і гэта добрая традыцыя, няхай яна падтрымліваецца. У гэтым годзе трэба і чэмпіянат Беларусі ўзяць, вам усё па сілах", - даў наказ спартсменам кіраўнік вобласці.
Памочнік Прэзідэнта - інспектар па Віцебскай вобласці Ігар Брыло прызнаўся, што ён заядлы спартыўны балельшчык, а цяпер, калі ён працуе ў паўночным рэгіёне, у ліку яго любімых каманд будзе і ХК "Віцебск".
Старшыня Віцебскага гарвыканкама Мікалай Арлоў таксама пажадаў хакеістам, каб яны заўсёды забівалі на адну шайбу больш, чым закідвае праціўнік у іх вароты.
