У Жыткавічах мінак выратаваў на пажары маці з двума дзецьмі (SB.BY)

Здарэнне адбылося ў адным з пяціпавярховых дамоў райцэнтра. Пажар узнік у кватэры на чацвёртым паверсе. Унутры знаходзілася сям'я: 25-гадовая гаспадыня і дзве яе дачкі ва ўзросце двух і сямі гадоў, паведамілі ў Гомельскім абласным упраўленні МНС. 

Выпадковым сведкам здарэння стаў 38-гадовы Вячаслаў Болдзін, які вяртаўся з абедзеннага перапынку на працу. Пачуўшы крык і заўважыўшы ў акне жанчыну з дзіцем, ён кінуўся на дапамогу. Прабірацца па задымленай кватэры мужчыну прыйшлося поўзкам. Пры гэтым ён выявіў крыніцу агню – гарэлі дзіцячыя цацкі. Каб прытушыць іх, Вячаслаў накінуў на іх бушлат.

Навобмацак яму ўдалося выявіць адну з дзяўчынак і вынесці яе на лесвічную пляцоўку. Перадаўшы дзіця суседзям, Вячаслаў Болдзін вярнуўся па гаспадыню з малодшай дачкой і вывеў абедзвюх на двор.

Усе чацвёра былі дастаўлены ў бальніцу. Больш за ўсіх пацярпела старэйшая дзяўчынка, якая атрымала сур'ёзныя апёкі. У крытычным стане дзіця перавезлі ў Мінск, за яе жыццё змагаюцца ўрачы. У астатніх дыягнаставана атручэнне прадуктамі гарэння.

 

Устаноўлена, што на момант здарэння жанчына спала. Хутчэй за ўсё, у гэты час яе старэйшая дачка вырашыла пагуляць з запалкамі. Сітуацыю пагоршыла адсутнасць у кватэры аўтаномных пажарных апавяшчальнікаў. Першапачаткова яны меліся, аднак з часам батарэйкі, што іх сілкавалі, разрадзіліся. Але замест таго, каб замяніць іх, гаспадыня палічыла за лепшае прыбраць з вачэй далоў прыборы, якія сталі бескарыснымі.

Здарэнне адбылося ўсяго праз суткі пасля іншай трагедыі, якая таксама здарылася ў Жыткавічах. Падчас пажару ў прыватным доме загінулі двое дзяцей – чатырохгадовы хлопчык і яго двухгадовая сястра. Яшчэ дваіх маці, якая таксама знаходзілася дома, удалося выратаваць. Абставіны НЗ са смяротным зыходам зараз высвятляюцца. Разгляданая версія – неасцярожнае абыходжанне з агнём.