Дыплом у кожнага ўдзельніка
Іх атрымалі на абласной інтэрактыўнай выставе-конкурсе мастацкіх вырабаў «Птушыны перапалох» майстры Пастаўскага Дома рамёстваў «Стары млын».
Выстава праходзіла ў канцы верасня ў Міёрах у рамках экалагічнага свята «Жураўлі і журавіны Міёрскага краю». На яе народныя ўмельцы Віцебшчыны прадставілі свае работы на птушыную тэматыку. Ад нашага Дома рамёстваў удзельнічалі шэсць майстроў, чацвёра з іх трапілі ў лік прызёраў.
Дыпломамі І ступені адзначаны вырабы Крысціны Брэскай і Яна Рубанюка. Крысціна перамагла ў намінацыі «Найлепшая выява птушак, занесеных у Чырвоную кнігу Беларусі», зрабіўшы балотную саву ў змешанай тэхніцы з элементамі саломапляцення. Ян аказаўся пераможцам у намінацыі «Найлепшы птушыны домік» — сваю работу ён стылізаваў пад беларускую народную хату. У намінацыі «Найлепшая мастацкая кампазіцыя беларускіх птушак» дыпломы ІІ ступені заваявалі Таццяна Петух і Вольга Гукава. Кіраўнік установы культуры прадставіла на конкурс выцінанку «Цецерукі», а яе падначаленая — тры маляванкі. Адна з іх — «Белы бусел у гняздзе» — з’яўляецца мастацкай рэканструкцыяй пано, якое захоўваецца ў фондах раённага краязнаўчага музея.
Акрамя таго, дыпломамі «За творчае ўвасабленне вобраза птушак у мастацкай традыцыі» адзначаны пано Вольгі Сафонавай «Цецярук», выкананае ў тэхніцы плоскаснай керамікі, і аб’ёмная прасторавая кампазіцыя «Чорныя буслы ў гняздзе» Юліі Калядзінай, якая выкарыстала тэхніку абрэзкавай лялькі-скруткі.
Алена Шапавалава, газета «Пастаўскі край»