Асаблівасці дэкларавання тавараў, якія належаць фізічнай асобе ва ўзросце да 16 гадоў

У адпаведнасці з падпунктам 10) пункта 14 артыкула 260 Мытнага кодэкса Еўразійскага эканамічнага саюза мытнае дэклараванне тавараў для асабістага карыстання фізічнай асобы, якая не дасягнула 16-гадовага ўзросту, ажыццяўляецца асобай, якая яе суправаджае (адным з бацькоў, усынавіцеляў, апекуноў або папячыцеляў гэтай асобы, іншай суправаджаючай асобай альбо прадстаўніком перавозчыка пры адсутнасці суправаджаючых асоб, а пры арганізаваным выездзе (уездзе) групы непаўналетніх асоб без суправаджэння бацькоў, усынавіцеляў, апекуноў або папячыцеляў, іншых асоб – кіраўніком групы альбо прадстаўніком перавозчыка).

Звесткі аб таварах для асабістага карыстання фізічных асоб, якія не дасягнулі 16-гадовага ўзросту, указваюцца разам са звесткамі аб таварах для асабістага карыстання асобы, якая суправаджае названых асоб, у адной пасажырскай мытнай дэкларацыі.     

Звяртаем увагу, што пры мытным дэклараванні тавараў фізічных асоб, якія не дасягнулі 16-гадовага ўзросту, асобай, якая іх суправаджае, у тым ліку кіраўніком групы такіх асоб або прадстаўніком перавозчыка пры арганізаваным выездзе (уездзе) без суправаджэння бацькоў, усынавіцеляў, апекуноў або папячыцеляў, іншых асоб складаецца вопіс тавараў з разбіўкай па кожнай фізічнай асобе. 

Па матэрыялах Віцебскай мытні