Як карыстацца электрапрыборамі і не спаліць кватэру
Давайце ўявім жыццё без рэчаў, да якіх мы так прывыклі. Жыццё без тэлевізара, які грае па вечарах на фоне. Няма ні мікрахвалевай печы, якая дазваляе падагрэць ежу адным націскам кнопкі. Пра пральную машыну, якая эканоміць каштоўны час і рэшту сіл пасля працоўнага тыдня, таксама можаце забыць. Халадзільнік, мабільны тэлефон і камп'ютар таксама канулі ў Лету. Гучыць як антыўтопія, ці не праўда? Большасць людзей, хутчэй за ўсё, нават не захоча ўяўляць такую трагічную сітуацыю або ўпадзе ў істэрыку.
Зручныя і практычныя электрапрыборы ў сучасным жыцці робяць наша жыццё нашмат прасцейшым, камфортнейшым. Але з'яўляецца і іншае пытанне – бяспечнага выкарыстання гэтых прылад. Яны могуць не толькі дапамагчы нам, але і, у выпадку нядобрасумленнага абыходжання, сапсаваць нам жыццё. Чытаць інструкцыі і выключаць прыборы з сеткі – справа немодная ў XXI стагоддзі і лічыцца пустой тратай часу. Каб вашы будні былі не толькі камфортнымі, але і бяспечнымі, расказваем пра важныя правілы, якія неабходна выконваць пры выкарыстанні тэхнікі.
Прывучыце сябе выключаць электрапрыборы з сеткі
Так зручна прыйсці дадому, узяць пульт і адным націскам уключыць тэлевізар, а заадно і паставіць лёгкім рухам рукі тэлефон на зарадку. Такая сітуацыя можа працягвацца пастаянна: днямі і нават гадамі. У непрацуючых, але ўключаных у разетку электрапрыборах многія вузлы знаходзяцца пад напругай, і ад перагрэву або замыкання яны могуць загарэцца ў любы момант.
Тэхніка не служыць стагоддзямі
Народны «лайфхак»: тэхніку, якая пабачыла жыццё, мы адпраўляем на дачу. Напэўна многія нават не здагадваюцца, але ў яе існуе тэрмін эксплуатацыі. Наколькі даўгавечна ваша прылада, можна даведацца ў інструкцыі, якую напэўна прыйдзецца пашукаць сярод іншых запыленых рэчаў на балконе. Скрыню Пандоры лепш не адкрываць: часам старым рэчам пара на спакой.
Перагружаць электрасетку – не лепшае рашэнне
У адзін няшчасны падаўжальнік мы ўключылі ўсё, што можна: камп'ютар, тэлевізар, абагравальнік, а ў Новы год яшчэ ўпрыгожылі кватэру гірляндамі. Утульнасць і цёплая атмасфера забяспечаны, але калі ў доме раптам нешта загарыцца, то здзіўляцца не варта. Празмерная нагрузка на электрасетку можа прывесці да перабояў у працы тэхнікі, а можа адбыцца зусім непрыемная сітуацыя – пажар у памяшканні. Запомніце: чым менш электрапрыбораў працуе адначасова, тым бяспечней.
І яшчэ некалькі невідавочных правіл, якія неабходна выконваць:
1) Прас варта размяшчаць толькі на негаручай паверхні;
2) Карыстайцеся сеткавымі фільтрамі, каб пазбегнуць узгарання з-за скокаў напружання ў сетцы;
3) Забудзьцеся пра электрапліткі і абагравальнікі з адкрытай спіраллю;
4) Рэгулярна выдаляйце з задняй сценкі халадзільніка пыл;
5) Электрапрыборы лепш ставіць далей ад лёгкаўзгаральных матэрыялаў.
Будзьце пільныя і адказныя. Нават калі вы купілі сучасны электрапрыбор, гэта не значыць, што ён цалкам бяспечны. «Не дагледзіш вокам, заплаціш бокам» – успамінайце гэтую прыказку кожны раз, калі выкарыстоўваеце электрапрыборы.
Ірына Саковіч
Старшы інспектар сектара прапаганды
і ўзаемадзеяння з грамадскасцю