Дзеці не шукаюць небяспекі, яны проста гуляюць!
Дарагія бацькі! Пастаўскі раённы аддзел па надзвычайных сітуацыях хоча звярнуць Вашу ўвагу на праблемы дзіцячага траўматызму, свавольства, бестурботнасці і іх наступстваў. Усе правілы пішуцца зыходзячы з горкага вопыту, аднак далёка не кожны гэта ўсведамляе, пакуль трагедыя не закране яго.
26 сакавіка ў Шаркаўшчынскі РАУС звярнуўся адзін з жыхароў райцэнтра, які працуе вартаўніком. Аказалася, што пакуль ён ахоўваў чужую маёмасць, страціў сваю. І на немалую суму.
Пацярпелы паведаміў: недалёка ад дома на полі згарэў прыналежны яму запас кармоў – 60 рулонаў сена. На пошукі зламыснікаў пайшло няшмат часу. Аказалася, што вінаватыя ў пажары – школьнікі…
Як распавялі ва УУС, двое мясцовых падлеткаў 13 і 14 гадоў, скарыстаўшыся адсутнасцю кантролю з боку дарослых, вырашылі пагрэцца (як тлумачылі пазней) і расклалі недалёка ад сена, метрах у дваццаці, вогнішча. Рамантычны адпачынак хутка ператварыўся ў некіраванае НЗ. Лёгкім павевам ветру іскры ад вогнішча аднесла да складзеных рулонаў. Яны загарэліся.
– Школьнікі хутка рэціраваліся з месца пажару, не зрабіўшы ніякіх спроб патэлефанаваць у МНС. На след аматараў цяпла знайшлі. І цяпер бацькам прыйдзецца не толькі кампенсаваць шкоду пацярпеламу земляку, але і несці адказнасць за неналежнае выхаванне сваіх сыноў.
18 мая ў Докшыцкім раёне ў вёсцы Замасточча патанула маленькае дзіця.
Па папярэдніх дадзеных, дзяўчынка знаходзілася ў двары дома са сваімі сваякамі. Праз некаторы час дзіця знікла з поля зроку. Бацькі кінуліся на пошукі і выявілі дзяўчынку ў вадаёме, размешчаным за домам.
Рэанімацыйныя мерапрыемствы не далі выніку. Выратаваць дзяўчынку, якой у чэрвені павінна было споўніцца два гады, не ўдалося. Прызначана судова-медыцынская экспертыза, апытаны сваякі загінулай і суседзі.
Па дадзеным факце Докшыцкім раённым аддзелам Следчага камітэта праводзіцца праверка.
У Жлобіне ад атрыманых на пажары траўм памерла дзіця. 3 мая 2022 у 07 гадзін 28 хвілін у службу выратавання па тэлефоне «101» паступіла паведамленне аб пажары ў кватэры ў горадзе Жлобіне, у мікрараёне №3.
Пры правядзенні разведкі ў дзіцячым пакоі выратавальнікі выявілі на падлозе за ложкам 8-гадовага хлопчыка і вынеслі яго на вуліцу. Работнікі хуткай медыцынскай дапамогі правялі рэанімацыйныя дзеянні, а затым даставілі пацярпелага ў рэанімацыйнае аддзяленне Жлобінскай раённай бальніцы. На жаль, на наступны дзень ад атрыманых траўм дзіця памерла.
Разгляданая версія прычыны пажару – дзіцячае свавольства з агнём.
І помніце: Вы ў адказе за дзяцей, а дзеці ў сваю чаргу не шукаюць небяспекі, яны проста гуляюць і Ваша задача не парадай, а правільным прыкладам растлумачыць правілы бяспечнай гульні!