У раённым Доме культуры прайшоў конкурс мнагадзетных сем’яў. Яго арганізатарам выступіла ўпраўленне па працы, занятасці і сацыяльнай абароне райвыканкама пры падтрымцы раённага выканаўчага камітэта, раённых арганізацый рэспубліканскага грамадскага аб’яднання “Белая Русь” і грамадскага аб’яднання “Беларускі саюз жанчын”. За права звацца лепшай сям’ёй сёлета змагаліся Нагановічы (Юнькаўскі сельсавет), Усовічы (Курапольскі), Мішуты (Валкоўскі) і Лазікевічы (г. Паставы).
Вядучая мерапрыемства Таццяна Кухальская прадставіла сем’і і членаў журы, у склад якога ўвайшлі намеснік старшыні райвыканкама Ю. М. Кісялёў, начальнік упраўлення па працы, занятасці і сацыяльнай абароне райвыканкама П. Л. Курто, намеснік старшыні камісіі па справах непаўналетніх райвыканкама М. П. Нагановіч, дырэктар раённага Дома культуры А. Б. Чарнюк, намеснік старшыні раённай арганізацыі рэспубліканскага грамадскага аб’яднання “Белая Русь” М. А. Кабайла, першы сакратар раённага камітэта ГА “БРСМ” І. А. Каралёва. Цёпла вітаў канкурсантаў Юрый Мікалаевіч Кісялёў. Ён, у прыватнасці, адзначыў, што сям’я — самае дарагое, што ёсць у чалавека. Вялікае шчасце, калі ў доме пануюць каханне, згода, узаемаразуменне і гучаць звонкія дзіцячыя галасы.
«Радавод»
Пасля жараб’ёўкі сем’і прыступілі да выканання першага этапа конкурсу. Называўся ён “Радавод”. Яго заданнем было расказаць пра членаў сям’і, яе традыцыі і звычаі, значныя падзеі, святы, погляды на жыццё і каханне. Кожнае выступленне суправаджалася мультымедыйнай прэзентацыяй, падчас якой з экрана дэманстраваліся здольнасці і захапленні, сумесная праца і адпачынак.
Сям’я Усовіч.
Неардынарнай была прэзентацыя сям’і Усовіч. Гаспадар Юрый Казіміравіч працуе механізатарам, яго жонка Жанна Аляксандраўна загадвае магазінам у Андронах, сыны Максім і Коля вучацца ў школе, а ўсеагульнай любіміцы Матроне 3 гадкі. У вершаванай форме яны расказалі пра лепшыя якасці кожнага. У сямейным куфэрку захоўваюцца самыя дарагія рэчы: ручнік, на якім муж з жонкай стаялі падчас шлюбу, свечка, што ахоўвае дом ад няшчасцяў, стужкі, якімі ўпрыгожвалі пялёнкі сыночкаў, калі забіралі іх з раддома. А яшчэ ўсіх гасцей гэта сям’я сустракае хлебам-соллю. Пачаставалі караваем Усовічы і журы, і гледачоў.
Юлію Валер’еўну Лазікевіч добра ведаюць пастаўчане. Яна — выконваючая абавязкі галоўнага рэдактара мясцовага тэлеканала “Паставы-ТБ”. Яе муж Ігар Вацлававіч працуе ў Пастаўскім мэблевым цэнтры. Дачушкі Сафія і Аня — школьніцы, пяцігадовы Ваня наведвае дзіцячы садок. Радавод сям’і ледзь змясціўся на вялікім аркушы паперы, які ўпрыгожылі фотаздымкі некалькіх пакаленняў. Падчас прагляду відэароліка прысутныя яшчэ раз упэўніліся ў тым, што гэта сям’я творчая. Асаблівы талент прадэманстравалі Сафія, Аня і Ваня. Музыкальныя, артыстычныя, абаяльныя, знаходлівыя, яны цудоўна малююць, іграюць на піяніна, захапляюцца лепкай з салёнага цеста, займаюцца спортам, танцуюць і спяваюць. Усе разам даглядаюць невялікую гаспадарку, любяць адпачываць на прыродзе.
Сям’я Мішута.
Мішуты з Валкоў прыехалі няпоўным складам — па ўважлівай прычыне адсутнічаў гаспадар сям’і Сяргей Васільевіч. Але Таццяна Іосіфаўна, якая працуе ў Валкоўскім сельвыканкаме, з дзецьмі Валерыяй, Веранікай і Уладзіславам годна прадставілі сям’ю.
Сям’я Нагановіч.
Дружнымі, згуртаванымі паказалі сябе Нагановічы з вёскі Кашыцы Юнькаўскага сельсавета: Канстанцін Міхайлавіч — электраманцёр раёна электрычных сетак, Юлія Аляксандраўна знаходзіцца ў водпуску па доглядзе дзіцяці, іх дачушкі Караліна і Ксенія, сынок Захар.
З фотаздымкаў, відэаролікаў і выступленняў на сцэне гледачы даведаліся, што ўсе таты працавітыя, майстравыя, мамы — клапатлівыя, сапраўдныя гаспадыні, мудрыя дарадцы, дзеці маюць шмат захапленняў і разам з тым надзейныя памочнікі бацькам, у тым ліку па доглядзе малодшых братоў і сясцёр, якіх вельмі любяць.
А ўвогуле ўсе ўдзельнікі даказалі, што для кожнага з іх сям’я — маленькі астравок, дзе існуюць свае традыцыі, пануюць узаемапавага і ўзаемаразуменне, фарміруюцца любоў да здаровага ладу жыцця, імкненне займацца творчасцю. А галоўнае — у дзяцей, якія выхоўваюцца ў гэтых сем’ях, шчаслівае дзяцінства, сагрэтае моцнай бацькоўскай любоўю. Шчасліва жыць аднаму немагчыма — сцвярджалі ўдзельнікі конкурсу.
“Нашы ручкі залатыя”
Так называўся другі этап конкурсу. У фае былі выстаўлены работы сем’яў. Мішуты з Валкоў частавалі выпечкай: якіх толькі прысмакаў тут ні было — торт, трубачкі, хрушчы, блінчыкі, тварожныя запяканкі і многае іншае. А яшчэ Таццяна Іосіфаўна разам з дзецьмі хораша спявалі.
Малюнкі Соні і Ані Лазікевіч занялі цэлы стэнд. На асобным стале размясцілася ляпліна з салёнага цеста. Затым усе члены сям’і паказалі лялечны спектакль “Яблык”. Ён быў павучальным як для дзяцей, так і для дарослых.
Пальмы з пластыкавых бутэлек, заяц з пенапласту, іншыя дэкаратыўныя формы для ўпрыгажэння панадворка дэманстравала сям’я Усовіч, у якой над тым, каб каля дома было прыгожа і ўтульна, шчыруюць і бацькі, і дзеці.
У сям’і Нагановіч як самыя дарагія рэліквіі захоўваюцца Ганаровыя граматы, Падзякі, дыпломы, якімі адзначаны старанная праца Канстанціна Міхайлавіча і Юліі Аляксандраўны, дасягненні ў вучобе, актыўнасць у школьным жыцці дзяцей.
“Мая краіна — мая сям’я”
Падчас гэтага этапа канкурсанты расказвалі пра любоў да Беларусі, Пастаўшчыны, тых мясцін, дзе нарадзіліся і жывуць. Прыемна было бачыць сям’ю Лазікевіч, члены якой выйшлі на сцэну ў беларускіх нацыянальных касцюмах і прыгожа гаварылі пра Бацькаўшчыну, а яшчэ станцавалі. Паэтычна і мілагучна распавядала пра малую радзіму Таццяна Мішута, сакрэтамі выхавання дзяцей дзяліліся Усовічы і Нагановічы.
— Паўтарагадзінная праграма была вельмі насычанай, — гаварыў у заключэнне Ю. М. Кісялёў. — Усе атрымалі масу пазітыву. Канкурсанты стараліся. Нават самыя маленькія шчыра дапамагалі мамам і татам, брацікам і сястрычкам спаборнічаць за званне самай паспяховай сям’і. Наступіў час падводзіць вынікі. Вы — малайцы! На вашых прыкладах трэба іншым дэманстраваць сямейныя каштоўнасці і традыцыі.
Вызначыць самых лепшых журы было няпроста. Але конкурс ёсць конкурс. На першае месца выйшла сям’я Лазікевіч. Складальнікаў іх лідарства шмат: творчасць Юлі, талент дзетак, адказнасць Ігара і, вядома, узаемаразуменне.
Усе ўдзельнікі мерапрыемства атрымалі дыпломы, каштоўныя падарункі, заахвочвальныя прызы.
Каштоўнасці не мяняюцца
Мяняюцца часы і норавы, людзі і іх жыццё, а галоўнай каштоўнасцю па-ранейшаму застаецца сям’я. Толькі ў ёй чалавек па-сапраўднаму адчувае пра сябе клопат, можа расказаць родным пра свае праблемы і радасці. На сям’і ляжыць адказнасць за выхаванне дзяцей, а значыць — за будучае краіны. Некалі вялікія сем’і — 5-8 дзяцей — былі нормай. У іх з маленства прывыкаюць усім дзяліцца з іншымі, частачку сябе аддаваць братам і сёстрам. Радуе, што апошнім часам колькасць сем’яў, якія выхоўваюць траіх і больш дзяцей, павялічваецца — на Пастаўшчыне такіх налічваецца 360. Істотную падтрымку аказвае ім дзяржава.
Было прыемна бачыць у зале групы падтрымкі з ліку не толькі родных канкурсантаў, але і старшынь Валкоўскага і Курапольскага сельскіх Саветаў Т. Б. Баторы і М. М. Яльчыка, калег.
Цудоўным аздабленнем конкурсу стала выступленне ўдзельнікаў мастацкай самадзейнасці: Марыны Ніканавай, Аліны Вайцяхоўскай, Юліі Запольнай.
Анна АНІШКЕВІЧ
Фота аўтара