Кожную вясну перад выпускнікамі школ паўстае пытанне выбару прафесіі і навучальнай установы, у якой можна яе атрымаць. Калі адны даўно вырашылі, куды будуць паступаць, то іншыя ніяк не могуць вызначыцца, кім быць. Менавіта ў дапамогу такім юнакам і дзяўчатам і ладзіцца штогод раённы прафарыентацыйны злёт.
Сёлета на яго сабралася дзве з паловай сотні 11-класнікаў з усіх школ горада і раёна. На сустрэчу з імі арганізатары запрасілі прадстаўнікоў раённага выканаўчага камітэта, вышэйшых і сярэднеспецыяльных навучальных устаноў розных профіляў.
— У сучасных умовах выбар прафесіі — адзін з найгалоўнейшых, які робіць у сваім жыцці чалавек, — гаварыў, звяртаючыся да моладзі, начальнік аддзела адукацыі, спорту і турызму райвыканкама А. Я. Кашырын. — І тут вельмі важна не памыліцца, бо сёння ідзе канкурэнцыя не толькі ў вытворчасці прадукцыі, але і пры атрыманні выпускнікамі працоўных месцаў. Прадпрыемствы і ўстановы маюць патрэбу не проста ў работніках з дыпломам, а ў тых, хто ўсвядомлена зрабіў прафесійны выбар і стаў за час вучобы выдатным спецыялістам.
Аляксандр Яўгеньевіч коратка спыніўся на настаўніцкай прафесіі, адзначыўшы, што сёння ў раёне працуюць каля 800 педагогаў з вышэйшай адукацыяй. Праз чатыры-пяць гадоў прыемна будзе сустрэцца з цяперашнімі выпускнікамі, якія закончаць педагагічныя ВНУ і ССНУ і змогуць даказаць, што менавіта яны патрэбны школам Пастаўшчыны. Перад 11-класнікамі выступіў таксама галоўны спецыяліст (юрысконсульт) упраўлення сельскай гаспадаркі і харчавання райвыканкама А. Ю. Машніч, які расказаў, дзе можна атрымаць прафесію юрыста і знайсці прымяненне набытым ведам і ўменням. А затым слова ўзялі прадстаўнікі навучальных устаноў.
Першымі сваю альма-матар прэзентавалі навучэнцы Пастаўскага дзяржаўнага каледжа. З дапамогай музыкі і песень яны расказалі, якіх спецыялістаў рыхтуюць у каледжы, і заклікалі выпускнікоў паступаць у яго. Аналагічную музычна-тэатралізаваную прэзентацыю прафесій падрыхтавалі навучэнцы Маладзечанскага гандлёва-эканамічнага каледжа. Але перш чым госці паказалі “жывую газету” і разыгралі шэраг сцэнак на тэму вучнёўскага жыцця, рэкламу ўстанове адукацыі зрабіла загадчыца дзённага аддзялення Г. У. Лівушына.
Як мага больш інфармацыі пра свае навучальныя ўстановы пастараліся даць выпускнікам і іншыя запрошаныя на прафарыентацыйны злёт — выкладчыкі Беларускага дзяржаўнага аграрнага тэхнічнага ўніверсітэта, Віцебскай дзяржаўнай акадэміі ветэрынарнай медыцыны і аграрнага каледжа пры ім, Беларускай дзяржаўнай сельскагаспадарчай акадэміі, Полацкага і Віцебскага дзяржуніверсітэтаў, ляснога, аграрна-эканамічнага і гандлёва-тэхналагічнага каледжаў у Полацку. Усе яны гаварылі пра перавагі паступлення ў названыя ВНУ і ССНУ, спецыяльнасці, якія можна там атрымаць, асаблівасці сёлетняй уступнай кампаніі і многае іншае, дэманстравалі відэафільмы пра навучальныя ўстановы, запрашалі ў іх на дні адчыненых дзвярэй, пакідалі рэкламныя буклеты.
У канцы сустрэчы, якая доўжылася дзве з паловай гадзіны, слова ўзяла галоўны спецыяліст аддзела па занятасці ўпраўлення па працы, занятасці і сацыяльнай абароне райвыканкама Г. Ф. Дзеравянка. Яна расказала, куды звяртацца тым выпускнікам, якія нікуды не паступяць або выберуць завочную форму навучання і захочуць знайсці работу. Усім 11-класнікам Галіна Фёдараўна і іншыя выступоўцы пажадалі ажыццяўлення намечаных планаў.
Алена ШАПАВАЛАВА.
Фота аўтара.